கலைஞரும் பப்பாளிப்பழமும்!

கலைஞரும் பப்பாளிப்பழமும்!

 நான் பப்பாளிப்பழம் சாப்பிடுவதை நிறுத்தி ஒன்றரை வருடமாகிவிட்டது!
போட்டிக்கு ஆளில்லாத எதையும் செய்ய மனம் ஒப்புவதில்லை!

யோசித்துப் பார்த்தால்,  இந்த ரெண்டு விஷயங்கள்தான் எங்கள் இருவருக்கும் பொதுவான இணைப்புச் சங்கிலிகளாய் இருந்திருக்கின்றன!

இன்று சந்தையில் அழகாய் அடுக்கிவைத்திருந்த பப்பாளிப் பழங்களைப் பார்த்தபோது அவர் நினைப்பு கண்ணைக் கசியவைப்பதை தவிர்க்கமுடியவில்லை!

இத்தனை ஆண்டு பந்தத்தை வெறும் ஒரு வருடப் பிரிவா மறக்கவைத்துவிடமுடியும்?

உடலுக்கு எவ்வளவு நல்லது என்று சொல்லித்தந்தபோதும் பப்பாளிப்பழம் ஏனோ வீட்டில் யாருக்குமே பிடிக்காது!

ஆனால் எனக்கும் அவருக்கும் மட்டும், ஒரு முழு பழத்தையும் சாப்பிட்டால்கூட திருப்தி வந்ததில்லை!

துண்டுதுண்டாக நறுக்கி ஒரு முள்கரண்டி போட்டு வைத்துவிட்டால் அன்றைக்கு அவருக்கு சாப்பாடே வேண்டாம்!

ஆனால் மிகச் சரியாக பாதிப்பழம் சாப்பிட்டதும்,

"கொண்டுபோய் ஃப்ரிட்ஜில் வை. அவன் வந்தால் பிரியமாக சாப்பிடுவான்!"

எத்தனை வற்புறுத்தினாலும், பழம் எவ்வளவு சுவையாக இருந்தாலும், அதற்குமேல் அவர் சாப்பிட்டதே இல்லை!

சமயங்களில் வீட்டுக்கு வந்து நானும் சத்தம் போடுவதுண்டு

"இது என்ன கிடைக்காத சரக்கா? நாளைக்கு நான் வாங்கிக்க மாட்டேனா?"

கேட்டால்தானே?

இதில் இன்னொரு விஷேசம், நான் சாப்பிடுவேன் என்று அவரும், அவர் சாப்பிடுவார் என்று நானும் கடைசி சில துண்டுகளை வைத்து அது வீணாகப் போவது தவிர்க்கவே முடியாத நடைமுறை!

இன்னொன்று,

கலைஞர்!

ஏறத்தாழ முப்பது நாற்பது ஆண்டுகளுக்கு முன்பே,

"போய் துரை டெய்லரிடம் நான் கேட்டேன்னு ஐம்பது ரூபாய் வாங்கிகிட்டு வா!"

நான் போய் கேட்டவுடனே, துரை ஆரம்பித்துவிடுவார்!

“என்ன, இந்த மாசமும் சம்பளம் கட்சி நிதிக்கு போயாச்சா?”

வருடத்துக்கு ஒரு மாத சம்பளமாவது, முரசொலி கடிதம், ‘ நிதி நிறைந்தவர் …’ என்று ஆரம்பிக்கும்போது கட்சி நிதிக்கு போய்விடும்!

“ஏம்ப்பா இப்படி?”

எப்போது கேட்டாலும் ஒரே பதில்தான்!

“இன்னைக்கு நான் அரசு உயர்நிலைப்பள்ளியில் ஆசிரியனாக இருக்க கருணாநிதிதான்டா காரணம்!”

“என்னப்பா இது லூசுத்தனமான பேச்சு?

நீங்க படிச்சீங்க அதுக்கு அவர் என்ன செஞ்சார்?”

“நானோ, உங்க பெரியப்பாவோ, சித்தப்பாவோ இத்தனை படிக்க முடியும்ன்னு எங்க அப்பா கூட நம்பியிருக்கமாட்டார்!

இதை சாத்தியமாக்கியது கலைஞர்!

நாம் சாப்பிடும் ஒவ்வொரு வாய் சோறும் அவர் போட்டது!”

அந்த வயதில் எனக்கு அது புரிந்ததில்லை!

கொஞ்சம் கொஞ்சமாக விபரம் புரிய ஆரம்பித்தபோது விளங்கியது!

இருந்தும், நான் அதை அவரிடம் ஒத்துக்கொண்டதில்லை!

அதற்கு வேறொரு காரணமும் இருந்தது!

எல்லாப் பிள்ளைகளைப்போல நானும் அப்பாவின் கொள்கைகளுக்கு முரண்பட்டது இயற்கை!

எனவே, எங்கள் கருத்து எதிலுமே ஒத்துப்போனதில்லை - அதனால், எந்தப் பேச்சுவார்த்தையும் வாக்குவாதமாகாமல் முடிந்ததில்லை - இதைத் தவிர!

அவரோடு பேச்சை வளர்த்தவாவது விவாதம் வளர்த்துவேன்!

“யார் வந்திருந்தாலும் இதைத்தான் செய்திருப்பார்கள், இதில் கலைஞருக்கு என்ன ஸ்பெஷல் க்ரெடிட்?

அவரை ஆட்சியில் உட்காரவைத்தோம், அவர் பதிலுக்கு நமக்கு இதை செய்தார்.

யார் வந்திருந்தாலும் இதைத்தானே செய்திருப்பார்கள்?”

“நீ படித்தவன்தானே? பக்கத்துக்கு மாநிலங்களிலும் வடக்கிலும் இருக்கும் நிலைமை இதுபோலத்தானா? 

யார் வந்திருந்தாலும் செய்திருப்பார்கள் என்பது ஹைப்பதடிக்கல்!

ஆனால், சம காலத்தில் இவர் செய்ததை வேறு யாரும் முயலக்கூட இல்லை!”

“சரி, அதற்குத்தான் எமெர்ஜென்சி காலத்தில் நீங்கள் உங்கள் வேலையைப் பணயம் வைத்து உதவி செய்துவிட்டீர்களே?”

“அது ஒரு சின்ன நன்றிக்கடன்! பிள்ளையாருக்கு பத்துப்பைசா சூடம் ஏற்றுவதுபோல!

அதோடு கோவிலுக்குப் போவதை நிறுத்திக்கொண்டுவிடுவோமா?”

எனக்கும் அவர் நியாயம் புரியாமல் இல்லை! 

ஆனால், பேச்சை வளர்த்தணுமே?

“அப்போ கலைஞர் குற்றமே இல்லாதவர்ன்னு சொல்ல வர்றீங்களா?”

"அது வேறு விஷயம்! என்னைக்கு அவர் முக முத்துவை முன்னிறுத்த ஆரம்பித்தாரோ அப்போதே அவரது நேர்மை கேள்விக்குறியாகிவிட்டது.

ஆனால், இது இரு கோடுகள் தத்துவம் மாதிரிதான்!

கலைஞரின் சமூக நீதிக்குமுன் இவையெல்லாம் மிகச் சிறிய கோடுகள்!”

இதுபோல் கனிமொழி, அழகிரி எல்லோரையும் விமர்சித்தவர், ஸ்டாலினை மட்டும் மனப்பூர்வமாக ஆதரித்தார்!

அந்தப் பையன் அடிபட்டு மேலே வந்தவன்!

கலைஞர் பையன் என்பதற்காகவே அவர் முதலமைச்சராவது தாமதிக்கப்படுகிறது என்பது அவரது தீர்மானமான எண்ணம்! 

சென்றமுறை கலைஞர் பதவிக்கு வந்தபோது, கட்சித் தலைமையை அவர் எடுத்துக்கொண்டு ஸ்டாலினை முதல்வராக்கியிருக்க வேண்டும் என்று பலமுறை சொன்னதுண்டு!

தெற்கிலிருந்து ஒரு சூரியன் புத்தகம் வந்தபோது அவர் குணம் தெரிந்து ரெண்டு காப்பி வாங்கிவந்தேன்!

ஒன்று அவருக்கு, மற்றொன்று எங்கள் எல்லோருக்கும்!

இரண்டு நாட்கள் அது அவர் கையை விட்டு அகலவில்லை!

எத்தனை முறை படித்தாரோ!

வாரிசு அரசியல், அடுத்து உதயநிதி வருவார் என்பது பற்றி ஒருமுறை சூடான விவாதம் வந்தது!

ஒரே வார்த்தையில் முடித்துக்கொண்டார்! 

"இதோ பார், நான் கலைஞருக்கு நன்றிக்கடன் பட்டிருக்கிறேன்!

அவர் என்ன தவறு செய்தாலும் நானோ, கலைஞரோ சாகும்வரை என்னோட ஓட்டு திமுகவுக்குத்தான்".  

சொன்னபடியே, கலைஞருக்கு கொஞ்சம் முன்னால் போய்விட்டார்!

எனக்காக நிச்சயம் காத்திருப்பார்!

என்றைக்காவது நானும் அவரிடம் போகும்போது, 

ஒரு கிண்ணத்தில் பப்பாளித் துண்டுகளை வைத்துக்கொண்டு பழையபடி ரெண்டுபேரும் கலைஞரைப்பற்றி கண்டிப்பாகப் பேசுவோம்!

சாந்திவனமும், ஆட்டுமந்தைகளும் சில குள்ளநரிகளும்!

அது ஒரு அழகிய வனம்!

வேற்றுமையில் ஒற்றுமை என்பதே அந்த வனத்தின் தாரகமந்திரம்!

உலகில் எங்குமே இல்லாத அளவு பல வகையான வேறுபட்ட விலங்குகள் கூடிவாழும் சாந்திவனம். 

ஒன்றிரண்டு வகைகள் வாழுமிடத்திலேயே ஓயாத சண்டைகளும் சச்சரவுகளும் மலிந்துகிடக்கும் புவியில் 

இத்தனை வகைகளும் ஒரே இடத்தில் பிரச்னைகளே இல்லாமல் கூடி வாழ்வது மற்ற எல்லா வனத்துக்கும் கொஞ்சம் உறுத்தல்தான்! 

சாந்திவனத்திலும் ஒரு சின்னப் பிரச்னை இருந்தது!

ஒரு சின்னத் துண்டு நிலம் வெள்ளாட்டுக்கா, செம்மறியாட்டுக்கா என்று!

ஏற்றிவிடும் ஓநாய்களின் சூழ்ச்சியால் இரண்டுமே தத்தம் நிலையில் உறுதியாகவே இருந்தன!

தங்கள் முப்பாட்டன் பிறந்த நிலம் அது என்று செம்மறியாடுகளும் தங்கள் பாட்டன் வாழ்ந்த இடம் என்று வெள்ளாடுகளும் நம்பின. 

பகைத்தீயை அணையவிடாமல் ஊதிக்கொண்டே இருந்தன ஓநாய்கள்!

ஆடுகள் ஓயாது முட்டிக்கொண்டதில் சிந்திய ரத்தத்தை நக்கிக் குடித்துக் கொழுத்தன வஞ்சக ஓநாய்கள்!

ஆண்டுக்கணக்கில் ஆட்டு மந்தைகள் மோதிக்கொள்வது பொறுக்காமல், இரண்டு தரப்பிலும் சில மூத்த ஆடுகள் கூடி ஒரு முடிவுக்கு வந்தன!

இருதரப்பும் யானையிடம் முறையிடுவது என்று!

யானையும் ஒற்றை நிபந்தனையோடு அந்த முறையீட்டை ஏற்றுக்கொண்டது!

"இரண்டு தரப்புமே பேசுவது பழங்கதை.

அதனால் இதில் ஒன்றுதான் உண்மை என்று தர்க்கரீதியாக என்னால் முடிவுசெய்ய முடியாது!

எனவே, மூத்த யானைகள் ஒன்றுகூடி, இருதரப்புக்கும் பெரிய அளவில்  பாதிப்பில்லாத ஒரு முடிவை அறிவிக்கிறோம்!

ஆனால், அந்தத் தீர்ப்பைத் தூக்கிக்கொண்டு வேறொரு யானைக்கூட்டத்திடம் பஞ்சாயத்துக்குப் போகக்கூடாது!

தீர்ப்பை எதிர்த்தோ விமர்சித்தோ இரு தரப்பும் மீண்டும் மோதிக்கொள்ளக் கூடாது"

- இதுவே அந்த நிபந்தனை!

இத்தனை வருட மோதல் தந்த வலியும் படிப்பினையும் இருதரப்பையும் யானை விதித்த நிபந்தனையை ஏற்றுக்கொள்ள வைத்தது!

சில ஆண்டுகள் எல்லாவற்றையும் பொறுமையாகக் கேட்டு ஆராய்ந்த யானை, உறுதியளித்தபடி இருதரப்புக்கும் பெரிய பாதிப்பில்லாத ஒரு தீர்ப்பை வழங்கியது!

ஆச்சரியப்படும்வண்ணம் இரு ஆட்டுமந்தையும் மகிழ்வோடு அப்படியே தீர்ப்பை ஏற்றுக்கொண்டு ஒன்றாய்க் கூடிக் கலந்தன!

வனத்தின் தென்கோடி முனையில் ஒரு குள்ளநரிக் கூட்டம் இருந்தது! 

அது அந்த இடத்தை தங்கள் வாழ்நாளில் பார்த்ததுகூட இல்லை! 

ஆனால் இத்தனை நாளும் தங்கள் அருகிலுள்ள ஆட்டு மந்தைகளை தூண்டிவிட்டு அவற்றின் ரத்தத்தில் வாழ்வது தவிர,  

உழைத்து வாழ்வது எப்படி என்றே மறந்துபோன அந்தக் குள்ளநரிக் கூட்டம்  இந்தத் தீர்ப்பையும், அதன் பிறகான அமைதியையும் நல்லிணக்கத்தையும் கண்டுபதைத்துப் போனது!

ஏதோ ஒரு தீர்ப்பு வரும். ஏதோ ஒரு மந்தை தனக்கு சாதகமில்லை என்று முரண்டுபிடிக்கும், மீண்டும் முட்டாள்களாக முட்டிக்கொள்ளும்!

நாம் வழக்கம்போல சிந்தும் ரத்தத்தை நக்கிப் பிழைப்போம் என்று காத்திருந்த நினைப்பில் மண் விழுந்ததை அந்த குள்ளநரிக்கூட்டத்தால் ஏற்கவே முடியவில்லை!

எந்த ஆட்டின் ரத்தம் சிந்தினால் என்ன, தாங்கள் நக்கிப் பிழைத்தால் போதும் என்று கூட்டம் கூடி யோசித்தன!

தங்களுக்கு சம்பந்தமே இல்லாத நிலத்தில் வந்த தீர்ப்பை வெள்ளாட்டுக் கூட்டம் ஏற்றுக்கொள்ளக்கூடாது. மேல் முறையீட்டுக்குப் போகவேண்டும், மறு ஆய்வு செய்யவேண்டும் என்று கூட்டம் போட்டுக் கோஷமிட்டன குள்ள நரிகள்!

அவற்றுக்கு உண்மையில் வெள்ளாட்டுக் கூட்டத்தின்மேல் பாசம், அக்கறை ஏதுமில்லை!

உழைத்துப் பிழைக்கும் வழக்கம் மறந்துபோன தங்கள் வயிறு நிறைக்க இனி என்ன வழி என்ற பதட்டம்தான் அவற்றை கோஷமிடவைத்தது!

வெள்ளாடுகளும் செம்மறியாடுகளும் ஒன்றாகச் சேர்ந்து இந்தக் குள்ளநரிக் கூட்டத்தை ஓட ஓட விரட்டும் காலம் வந்துவிட்டதைப் பாவம் அவை அறியவில்லை!

 பி கு:

இந்தக் கதைக்கும், வேல்முருகன், திருமாவளவன், திருமுருகன் காந்தி போன்ற  சில ஒட்டுண்ணிகள் இன்று நடத்திய சுயநல ஆர்ப்பாட்டத்துக்கும் ஏதாவது சம்பந்தம் இருப்பதாய் நீங்கள் நினைத்தால் அது வெறும் தற்செயலே!