ஞாயிறு, 29 ஆகஸ்ட், 2021

#ஹோம் என்றொரு ஃபீல் குட் படம் சொல்லும் அழுத்தமான சேதி!

மலையாளப் படங்கள் பார்ப்பதில் ஒரு வசதி. 
கொஞ்ச நேரத்தில் சினிமா பார்க்கிறோம் என்பதை மறந்து பக்கத்து வீட்டில் நடப்பதை அங்கேயே உட்கார்ந்து பார்ப்பதுபோல் உணர ஆரம்பித்துவிடுவது! அதிலும் சில படங்களில் நடிக்கிறார்கள் என்பதைக் கண்டுபிடிக்கவே கொஞ்ச நேரம் ஆகும்! 
இது அந்தவகைப் படங்களில் ஒன்று.  
இணையம் சிலாகித்த படங்கள் பெரும்பாலும் என் விருப்பத்தேர்வாய் இருப்பதில்லை என்பதாலேயே பார்க்கலாமா வேண்டாமா என்ற யோசனையில் தள்ளிப்போட்டுக்கொண்டே வந்த படம்! 
ஒரு கட்டாயத்தை ஏற்படுத்திவிட்ட சூழலில் இன்று பார்க்க உட்கார்ந்தேன்! 
ஒரு அறுபதைத் தாண்டிய சராசரி குடும்பஸ்தனின் கதை. இதை இரண்டரை மணிநேரம் அசையாமல் உட்கார்ந்து பார்க்கவைத்தது இயக்குனர் ரோஜின் தாமஸ்ஸின் சாமர்த்தியம்! 
இந்த்ரன்ஸ் என்ற கதாநாயகனுக்கான எந்த லட்சணமும் இல்லாத நடிகர்தான் ஹீரோ! 
ஏறத்தாழ முழுப்படமுமே அவரைச் சுற்றியே இயங்குகிறது! 
நீல் குன்சா (?) ஒளிப்பதிவும், ராகுல் சுப்ரமணியம் இசையும் அந்த வீட்டின் ஹாலில் நம்மைக் கொண்டு விட்டுவிட்டு தள்ளி நின்று வேடிக்கை பார்க்கின்றன!
கற்பதை நிறுத்திக்கொள்ளாத, கற்க சூழல் அமையாத, அன்புக்கும், அனுசரணையாக இரண்டு வார்த்தைக்கும் ஏங்கும் ஒரு குடும்பஸ்தனாக வாழ்ந்திருக்கிறார் இந்த்ரன்ஸ்! 
ஏதோ ஒரு ஃப்ரேமிலாவது நடிக்கிறாரா என்று தேட வேண்டியிருக்கிறது! 
ஆனால், அவரை தனிப்பட்ட முறையில் பாராட்டுவது கொஞ்சம் ஒரவஞ்சனைதான்! 
எல்லோருமே, ஒரு காட்சியில் தலை காட்டிப்போகும் நடிகர்கள், அவ்வப்போது தலைகாட்டும் அந்த அல்சைமர் தந்தை, அம்மா, கதாநாயகி குடும்பம் என, எல்லோருமே தங்கள் வீட்டுக்குள் வைக்கப்பட்ட கேண்டிட் கேமராவில் படம் பிடிக்கப்பட்டதுபோல் அவ்வளவு இயல்பு! 
 இப்படியான கதை அம்சம் உள்ள எல்லா மலையாளப் படங்களையும்போல, வில்லன் என்று யாரும் இல்லாத படம்! 
சூழ்நிலைதான் அவ்வப்போது தலைகாட்டும் வில்லன்! அந்த சூழலை கடுகளவும் மிகை உணர்ச்சி இல்லாமல் காட்சிப்படுத்துவதில் ஒவ்வொருவரும் வென்றிருக்கிறார்கள்! 
குறை என்று சொல்ல ஏதுமே இல்லையா என்றால், கடைசி பத்து நிமிடம் கொஞ்சம் சினிமாத்தனமான நகர்வது! 
அந்த அம்மா கேரக்டர் கையில் மைக் வாங்கும்போதே, அவர் பேசப்போவது என்ன என்பதை யூகிக்க முடிவதும், அதற்குப்பின் ஒரு தேர்ந்த நாடக ஸ்க்ரிப்ட் போல கதை நகர்வதும்! 
ஆனால், ஒரு ஃபீல்குட் மூவி முடிவுக்கு இதைத் தவிர வேறு திரைக்கதை அமைப்பு சாத்தியமே இல்லை!
ஒரு படம், பார்ப்பவரை ஏதோ ஒரு மாயக் கணத்தில் தனக்குள் இழுத்துக்கொள்வதும், தன் வாழ்வோடு கனெக்ட் செய்துகொள்ள வைப்பதும் மட்டுமே அதன் மகத்தான வெற்றி! 
இந்தப்படம் அப்படி என்ன செய்தது? 
நேற்று காலை ஆறுமணி வாக்கில் ஒரு தொலைபேசி அழைப்பு - என் நேசத்துக்குரிய ஒரு ஜீவனிடமிருந்து! இன்று அவர் எந்த அளவுக்கு உயர்ந்திருந்தாலும், என்வரை, அந்தப் பள்ளி, கல்லூரி கால சிறுவனாகவே உறைந்து போனவர்! 
வருடத்துக்கு ஒருமுறை எப்போதாவது வெகு ஃபார்மலாக சில வார்த்தை பேசுவதே அபூர்வம்! 
அந்த அதிகாலை நேரத்தில், அவரது அழைப்பு, என்னவோ ஏதோ என்ற பதட்டத்தையே ஏற்படுத்த, அண்ணா, ஃப்ரீதானே, ரெண்டு நிமிஷம் பேசலாமா, என்று தழுதழுத்த குரலில் ஆரம்பித்தார்! 
ஒன்னும் பிரச்னை இல்லையே, எல்லோரும் நலம்தானே என்று கேட்டபோது, எல்லோரும் நலம்தான் அண்ணா, பொதுவாக நான் திரைப்படம் பார்ப்பதை ஏறத்தாழ நிறுத்திவிட்டேன்! எல்லோரும் சொல்கிறார்களே என்று இன்றைக்கு அதிகாலை பார்க்க ஆரம்பித்து இப்போதுதான் முடித்தேன்! 
உடனே உங்களைத்தான் கூப்பிடத் தோன்றியது! அண்ணா, எனக்கொரு சின்ன உதவி, நீங்கள் அந்தப் படத்தை பார்த்து உங்கள் அபிப்ராயத்தை சொல்லுங்கள்! 
 நம் இருவருக்குமான ஒரு ஒற்றுமை இந்த காலை நேரத்தில் உங்களை தொந்தரவு செய்ய வைத்துவிட்டது! 
என்ன படம்? 
அண்ணா, அது ஒரு மலையாளப்படம்! நான் எல்லாம் எவ்வளவு மோசமாக நடந்துகொண்டிருக்கிறேன் என்று எனக்கு குற்றஉணர்ச்சியாக இருக்கிறது! 
என்னடா, லூசு மாதிரி பேசறே? நீ ஒன்னும் அவ்வளவு மோசமானவன் இல்லையே? 
இல்லை அண்ணா, வேலை, மற்ற அழுத்தம் காரணமாக அப்பாவை சில சமயம் கொஞ்சம் எடுத்தெறிந்து பேசிவிட்டோமோ, அலட்சியமாக நடத்திவிட்டோமே என்று தோன்றி, இதை யாரோடாவது பகிர்ந்துகொண்டே ஆகவேண்டும் என்று தோன்ற, உங்களை இந்த நேரத்தில் தொந்தரவு செய்ய நேர்ந்துவிட்டது! 
நாளை அந்தப் படத்தை பார்த்துவிட்டு கண்டிப்பாக சொல்றேன்! என்ன படம் அது? 
#ஹோம் என்றொரு மலையாளப் படம்! 
இதுதான் அந்தப் படத்தின் வெற்றி, 
 உடனே, உடனே, தன்னை அதோடு பொருத்திப் பார்த்துக்கொள்ள, தன் தகப்பன் மீதான நேசத்தை தூண்ட வைத்ததுதான் இதன் வெற்றி! 
நான் அவருக்கு சொல்ல எண்ணிய பதில், 
நாம் எல்லோருமே நல்லவர்கள்தான்! 
 ஒரு திரைப்படம் தன்னுடைய நேசத்தை மறுபரிசீலனை செய்ய வைக்குமளவு பூஞ்சை மனம் இருக்கும் யாருமே கெட்டவர்களாக இருக்க வாய்ப்பில்லை! 
நாமாகத் தேடிக்கொண்ட, சமுதாயம் நம் மேல் ஏற்றிவைத்த வாழ்வியல் அழுத்தங்கள்! 
மற்றவர்களோடு ஒப்பிட்டே நம் வெற்றி தோல்வியை நிர்ணயிக்கும் நிர்பந்தம் என, சாகும்வரை ஓடிக்கொண்டே இருந்தாகவேண்டிய சூழலுக்கு முதல் பலி, குடும்பத்தினரோடான உறவு! 
உலக மயமாக்கப்பட்டதில் ஏற்பட்ட போட்டிகள், அலுவலக அழுத்தங்கள், அங்கு தெரிந்தே செய்துகொள்ள வேண்டிய கட்டாய சமரசங்கள் ஏற்படுத்தும் தார்மீகக் கோபங்கள் இதெல்லாம் வெளிப்பட வேறு இடம் ஏது? 
அதிலும், குழந்தைகளும், ஏறத்தாழ குழந்தைகளாகளே மாறிவிட்ட நம் பெற்றோரும்தான் பெரும்பாலும் சுமைதாங்கிகள்! 
இது தவிர்க்கமுடியாமல் நாம் கொடுத்தே ஆகவேண்டிய விலை! 
அப்படி ஏதாவது பேச நேர்ந்துவிட்ட நாளின் இரவில், நாம் அதுகுறித்து நமக்குள் வருந்திக் குமைவதை நிறுத்திக்கொள்ளாதவரை, நாம் எல்லோரும் நல்லவரே! என்ன, ஸாரிப்பா, நேற்று ஏதோ வெளிப்புற அழுத்தம் காரணமாக உங்களிடம் தேவையின்றி முகத்தைக் காட்ட நேர்ந்துவிட்டது என்று அவர்களிடம் மறுநாள் சொல்ல, நம் பாழாய்ப்போன ஈகோ இடம் கொடுப்பதில்லை! 
அந்தத் தம்பி உட்பட, இன்றும் இனியேனும் அந்த சமன்பாட்டை சரி செய்துகொள்ள, பலருக்கும் வாய்ப்பு இருப்பது ஒரு ஆறுதல்! 
என்னைப்போல் சிலருக்கு, அந்த வாய்ப்பும் இல்லாமல், இல்லாதுபோன தகப்பன்கள் தரும் தண்டனைதான் இதுபோன்ற படங்கள்! 
இது வெறும் பிரசவ வைராக்கியமாக இல்லாமல், கோபத்தை, அழுத்தத்தை வயதான பெற்றோர் மீதான அலட்சியமாய் வெளிப்படுத்தாமல் இனி மிச்சமிருக்கும் காலத்தில் நடந்துகொள்ள முயல்வதே, நம்முள் நசுங்கிக் கிடக்கும் நல்லவரை உயிர்ப்பிக்கும் செயலாக இருக்கும்! 
 அதற்கு இதுபோன்ற படங்கள் ஒரு காரணியாக இருக்கும்!

சனி, 21 ஆகஸ்ட், 2021

நயன்தாராவை ஏன் நான் வியந்து பார்க்கிறேன் என்றால்…

Why she is so adorable !
அவர் இருந்தது, இருப்பது மீடியா வெளிச்சம் எந்த நேரத்திலும் எதிர்பாராத விதத்திலும் துரத்திக்கொண்டே இருக்கும் ஷோ பிஸினஸில்! 
இங்கு இமேஜ்தான் எல்லாமே!
புனித பிம்பம் எந்நேரமும் காப்பாற்றித் திரிவது அடிப்படைக் கட்டாயம்! 
கையில் ஒரு கேமராவோ, மைக்கோ, ஒரு மொபைலோ இருந்தால், உங்கள் அந்தரங்கத்தில் தங்குதடையின்றி உரிமையோடு புக தாங்களாகவே சுதந்திரம் எடுத்துக்கொண்ட கலாச்சாரக் காவலர்கள் உலவும் இடம் இது. 
இந்தத் துறையில் மன்னாதி மன்னர்களாக கோலோச்சிக்கொண்டிருந்த ஆண்களே, தங்கள் அந்தரங்கங்களை, சின்னச் சின்ன அபிலாஷைகளைக்கூட ரகசியமாய் மறைத்துப் பொத்திப் பாதுகாப்பதுதான் நூற்றாண்டு வழக்கம்!
பெண்களைப் பற்றிக் கேட்கவே வேண்டாம். சாதாரணமாக தன்னோடு பணிபுரியும் சக ஆணோடு தனியே உட்கார்ந்து சிரித்துப் பேசினாலே அவர் கற்பு காற்றில் பறந்ததாய் கதைத்து மொத்தமாக எதிர்காலமே காலியாகும் இடம்!
யாரையோ காதலிக்கிறார் என்று ஒரு வதந்தி பரவினாலே போதும் ஃபீல்ட் அவுட் ஆக!
இந்த சூழலில் தனித்து நிமிர்ந்து நின்றவர் இவர்!

அடுத்தடுத்து சில காதல்கள்!
அது என் சொந்த விஷயம் என்ற தெளிவு! 
கேள்வி கேட்டபோது மறைக்கவோ மழுப்பவோ செய்யாமல் பதில் சொல்ல அவசியம் இல்லை என்று புறம் தள்ளி நகர்ந்த கம்பீரம்!

ஒவ்வொரு உறவு முறிவின்போதும், தான் ஏமாற்றப்பட்டதாய் பெட்டைப் புலம்பலோ குற்றச்சாட்டோ ஏதுமில்லை. 

காதலித்து பணம் வாங்கிக்கொண்டு ஏமாற்றிய பெண்களின் கதைகளே உலாவும் இடத்தில், ஒரு மிகப்பெரும் விதிவிலக்காய் தன் சம்பாத்தியத்தில் தான் நேசித்த ஆண்களுக்கு வாரியிறைத்து, விலகிப்போனபோதும் குற்றம் சாட்டாத முதல் பெண்மணி. 
உண்மையான காதலில் மட்டுமே இப்படி ஒரு பெருந்தன்மை சாத்தியம்!
A real Alfa female.

இந்த ஏமாற்றங்கள் போதாதென்று இண்டஸ்ட்ரி வழக்கப்படி, மொத்தமாக ஃபீல்ட் அவுட்!
இனி அவர் அவ்வளவுதான் என்று எல்லோரும் முடிவு செய்திருந்தபோது, ரீ எண்ட்ரி!
கம்பேக் என்பது ஒரு படமோ ரெண்டு படமோ, பின் அண்ணி, அக்கா, சீரியல் என்று ஓரம் கட்டப்படுவதே இன்றுவரை வழக்கம்!
அதை ஒட்டுமொத்தமாக மாற்றினார். 
அடுத்தடுத்து, பெண்ணை, கதாநாயகியை மையப்படுத்தி படங்கள்!
அத்தனையும் சூப்பர் ஹிட்!
சக போட்டியாளர்கள் வியந்தும், எரிந்தும் பார்க்க, உச்சத்தில் ஓர் சிம்மாசனம்- அதில் அசைக்கமுடியாமல் கம்பீரமாக உட்கார்ந்தவர் இன்றுவரை கீழிறங்கவில்லை!
விமர்சனங்களும் வெற்றுக் கூச்சல்களும் இவர் சுண்டுவிரல் நகத்தைக்கூட தொட முடியவில்லை!

சீதை ரோலில் இவர் நடிக்கக்கூடாது என்று ஒரு ஆர்ப்பாட்டம். 
ஏதோ ஒரு அரசியல் வாரிசு எங்கோ தற்கொலைக்கு முயன்றதற்கு இவர் காரணம் என்றொரு அபத்தக் கிசுகிசு! 
எதற்கும் அசரவில்லை அவர்!
இரண்டாவது வாய்ப்பில் எத்தனை ஜாக்கிரதையாக இருப்பார்கள் எல்லோரும்?
தன்னை வைத்து படம் தயாரித்த ஒரு பெரிய இடத்து நடிகரை மேடையிலேயே வைத்துக்கொண்டு, சிரித்துக்கொண்டே நாக்கைப் பிடுங்கிக்கொள்ளும்படி கேள்வி கேட்ட திண்மை!
முப்பதுகளின் பிற்பாதியில் இருக்கும்போதும், இன்றும் தன்னை மையப்படுத்தி எடுக்கப்படும் அடுக்கடுக்கான வெற்றிப் படங்களின் நாயகி.
இப்போதும், தன் மனம் கவர்ந்தவரை எந்த ஒளிவு மறைவுமின்றி தன் உழைப்பால் ராஜாவைப்போல் பார்த்துக்கொள்ளும் ராணித் தேனீ!
துறையில் அறியாத இளம் பெண்ணாக நுழைந்து, ஏறத்தாழ இருபது ஆண்டுகள் தன் இடத்தை தக்கவைத்துக்கொண்டுள்ள லேடி சூப்பர்ஸ்டார்.
பெண்களுக்கு மட்டுமல்ல, ஆண்களுக்கும், தன் நெஞ்சறிவது பொய்யற்க என்பதற்கு பேருதாரணம் இவர்!
அழகு என்பது அகம் சார்ந்தது என்பதை அழுத்தமாக நிரூபித்தவர்!
பொதுவாக பெரியோரை வியத்தலும் இலமே என்ற கொள்கை உள்ள என்னை வியந்து நிமிர்ந்து பார்க்கவைத்த உண்மையான இரும்புப் பெண்மணி!
பேராண்மை என்ற பதத்துக்கு வாழும் உதாரணங்களில் ஒருவர்!
டயானா மரியம் குரியன்!

வியாழன், 15 ஜூலை, 2021

செலின் என்றொரு சேட்டு மயில்!

 


"எரும, எப்படிடா இருக்கே?"

ஏறத்தாழ இப்படித்தான் ஆரம்பிக்கும் அவள் ஃபோன் கால்கள் எல்லாமே!

வருஷக்கணக்கில் பேசாமல் இருந்து கூப்பிட்டாலும் ஏதோ அஞ்சு நிமிஷத்துக்கு முன்னால பேசினதோட தொடர்ச்சி மாதிரிதான் பேச்சு ஆரம்பிக்கும்!

கால ஓட்டத்தில் பேர் சொல்லிக் கூப்பிடவே ஆட்கள் இல்லாமலே போய்விட்ட நிலையில்,அநேகமாக என்னை டேய்ன்னு கூப்பிடறது இந்த ஒரு ஜீவன்தான் இன்னும்!

அதே அதிகாரம்உரிமை, நட்பு எல்லாமே குறையாமல் இருக்கும் குரலில்!

ஆனால், இப்போ நான் பேசவந்தது ஞாயிற்றுக்கிழமை மாலை வந்த வேறொரு ஃபோனைப்பற்றி!

செலின்!

ஈரோடு மாதிரி ரெண்டும்கெட்டான் ஊருக்கு இந்தப் பேரே ரொம்ப அதிகம்!

போடெரிக் ப்ரூக்ஸீல்ட்ஸ் ரெண்டும் சரியான விகிதத்தில்  கலந்த ஆறடி உயர மெழுகுச் சிலை!

குஜராத்லருந்து மடி நிறைய பணத்தை கட்டிக்கிட்டு ஈரோட்டுக்கு மைக்ரேட் ஆகிவந்த சேட்ஜி, வட்டிக்கு விட்டு வந்த காசுல ஊட்டி வளர்த்த மயில்.

சேட்ஜி வட்டிக்கடையை உபதொழில் ஆக்கிட்டு, டெக்ஸ்டைல் ப்ராசஸிங் யூனிட் ஆரம்பிச்சு, ஈரோடு சேம்பர் ஆஃப் காமர்ஸ்ன்ற ஒன்றரையணா அமைப்புக்கு தலைவர்!

 சேட்டு நாசமாய்ப் போகட்டும். செலினைப்பத்தி பேசுவோம்!

செலின்-எங்க காலேஜுக்குன்னு ஆண்டவன் அனுப்பி வெச்ச ஆசீர்வாதம்.

7A நிக்கறதுக்கு முன்னாடியே குதிச்சு அப்படியே மெதந்து வரும்போது எல்லாப் பயலுக மூஞ்சியிலும் பல்ப் எரியும்!

காலேஜுக்கே ஒரு பிரத்தியோக வெளிச்சம் வந்தமாதிரி இருக்கும்!

'வாய மூடுங்கடா, நுழையப்போகுது' சொல்லிக்கிட்டே படியேறும்போது பசங்க மனசு மாதிரியே தளும்பி வழியும்!

சரியான அளவெடுத்துச் செஞ்ச அரபிக்குதிரை!

அரை அங்குலம் கூடக் குறைய இல்லாத ஆரியச் சிலை!

போதும்! விட்டா அஞ்சு பக்கத்துக்கு வர்ணிக்கலாம்!

அவ்வ்வ்வ்வ்வ்வளவு அழகு!

ஆனால், தான் அழகி என்ற நினைப்பே கொஞ்சம்கூட இல்லாத சகஜ பாவம்தான்அவள் பேரழகு!

ஏய், உண்மையாவே நீ அழகுடி!

சரி, அதுக்கென்ன இப்போ?

இதுதான் அவள் சொல்லும் பதிலாக இருக்கும்!

சாரி, சுடிதார், ஜீன்ஸ் குர்த்தி, எதுவுமே அவ்வளவு பாந்தமாகப் பொருந்தும் உடல் வாகு!

அதுவும், அந்த அபாயகரமான இடுப்பு வளைவுல, நழுவிடுமோன்னு தவிக்கவிடறமாதிரி அவள் சேலைக்கட்டு காலேஜ் பிரபலம்!

உன் இடுப்பு எனக்கு பயங்கர டிஸ்டராக்சன்டின்னு சொன்னா, உன்னை யார் நாயே அங்கே பார்க்கச் சொன்னதுன்னு சிரிச்சுட்டே தற்காலிகமா சரி செஞ்சுக்குவா! அந்த சேலைக்கட்டு கூட இயல்பாகத்தான் இருக்குமே தவிர, கவர்ச்சியாக இருக்காது!

செக்யூரிட்டில இருந்து, கேண்டீன் உன்னி, பிரின்சிபால் வரைக்கும் எல்லோருமே அவளுக்கு ஃப்ரெண்டுதான்!

ஒருதடவை ஆர்கானிக் கெமிஸ்ட்ரி நடத்தும்போது லெக்சரர் சக்திவேல் இப்படியா அடக்கமில்லாம உட்காருவேன்னு கேட்கப்போக, கோபிச்சுக்கிட்டு எழுந்துபோனவ, பிரின்சிபால் ரூம்ல போய் அந்த ஆள் என்னை ஏன் சார் அந்த இடத்தில் பார்க்கறார்ன்னு ஒரே ரகளை!

வேற வழியே இல்லாமல் அனந்தபத்மநாப நாடார் அலையாஸ் ப்ரின்ஸி, கிளாஸுக்கே வந்து மத்தியஸ்தம் செஞ்சு, சக்திவேல் சாரி சொல்லி...

இது ஒரு சோறு பதம்!

கண்டிப்பா குஷி படம் எடுக்கறதுக்கு முன்னால எஸ் ஜே சூர்யா செலினை எங்கேயாவது பார்த்திருப்பார்!

அறுந்த வாலு!

காலேஜ்ல அவ இல்லாம கல்ச்சுரல்சே இல்லை.

அந்த வருஷம் காலேஜ் எலெக்சன்ல முகமது அலி, எங்க கேண்டிடேட்!.

இப்ப மாதிரி காலேஜ் எலெக்க்ஷன்ல, அரசியல் எல்லாம் எட்டிப்பார்க்காத ஆரோக்கியமான சூழல்!

பிட் நோட்டீஸ்ல, வகைதொகையில்லாம வாக்குறுதி!

சில்க் ஸ்மிதாவ காலேஜ் டேக்கு வரவைப்பேன்”,

ஸ்போர்ட்ஸ் டே க்கு கபில்தேவ்”,

ஆண்டுவிழாவுக்கு கலைஞர்

இப்படி!

முகம்மது அலிக்கு, டஃப் ஃபைட் கொடுத்த கந்தசாமிய, வெறும் குப்பைத்தொட்டியை வைத்து தோற்கடித்தது வரலாறு !

ரெண்டுபேருக்கும் ரொம்ப நெருக்கமான போட்டி!

ஆர்ட்ஸ் பசங்க கந்தனுக்கு தீயா வேல செய்யறானுக!

பொண்ணுங்க ஓட்டெல்லாம் கந்துக்குத்தான்டா!இது செலின் கொடுத்த வாக்குமூலம்!

அவனோட வாக்குறுதி, “கல்ச்சுரல்ஸுக்கு கமலஹாசன்”!

என்னடீ பண்ணலாம், நீயே சொல்லுன்னு கேட்டா, தேவதைக்கும் பதில் தெரியல.

முந்தையவாரம் செலின் ஏறத்தாழ கண்ணீரோட பொலம்புன, அப்ப சின்னப் பிரச்னைன்னு பட்ட, ஒரு விஷயம் சட்டுன்னு ஞாபகம் வந்துச்சு!

அலி பாய்கிட்ட ஐநூறு ரூபாய வாங்கிக்கிட்டு, செலினும் நானும் ஒரு ஆட்டோல டவுனுக்கு கிளம்பிட்டோம்!

அப்பல்லாம் டூ வீலர் ரொம்ப கம்மி!

நேரா ஃபேன்சி ஸ்டோர் போனவங்க, நல்லதா மூடி போட்ட  ஒரு ஆறு குப்பைத் தொட்டி, காலில் மிதித்துத் திறக்கற மாடல், வாங்கிக்கிட்டு, நேரா காலேஜ்!

எல்லா லேடீஸ் டாய்லட்லயும் ஒன்னொன்னு!

கமலஹாசனா, கன்வீனியன்சியான்னு செலின் போட்ட கோஷம், முக்கால்வாசி பொண்ணுக ஓட்டு அலி பாய்க்கு!

நான், துரை, ரமேஷ், கார்த்தி, மோகன், செலின், உமா, காயத்ரி!

நம்ம எல்லோரும் ஃப்ரெண்டஸ், கடைசி வரைக்கும்!

இந்த லவ் கன்றாவியெல்லாம் வேண்டாம்!

ஜாலியா ஊர சுத்துனமா, படிச்சமா, அப்பா அம்மா சொல்ற கிறுக்கனையோ, கிறுக்கியவோ கல்யாணம் பண்ணுனமான்னு இருக்கணும்!

இதுதான் ஒப்பந்தம்!

கடைசி வருஷம் பாதிவரைக்கும் ஒழுங்காத்தான் போச்சு!

ஒருநாள் உமாதான் மெல்லச் சொன்னாள்!

"நானும் கார்த்தியும் லவ் பண்றோம்!"

வழக்கமான சினிமாக்காதல்!

யார் சொன்னதும் காதுல ஏறல!

கார்த்தி டேய், நீ ப்ராமின் மாதிரியே இருக்கேன்னு உமா சொல்றாடா!

காயத்ரிதான் கேட்டா, “ஏன்டா எருமை! அதுக்கு அவ ஒரு ப்ராமின் பையனையே கட்டிக்கலாமேடா!

அதத்தானே அவங்க அப்பாவும் சொல்லுவாரு!

தினமும் எலும்பு கடிக்கறவன் நீ, அவ ரொம்ப ஆசாரமான ஐயர் பொண்ணுஏண்டா இந்த பாவமெல்லாம்னா, ரெண்டும் கோரஸா, கல்யாணத்துக்கப்புறம் அட்ஜஸ்ட்

பண்ணிக்குவோம்!

அதுக்கப்புறம் எல்லாமே வேகமா நடந்துச்சு!

அப்பாவுக்கு விஷயம் தெரிஞ்சு உமா காலேஜ் வர்றது நின்னுச்சு!

பத்துநாளா, கார்த்தி வெறிச்சுப் பார்த்துக்கிட்டே ஹாஸ்டல் ரூமே கதி!

இந்த நிலைலதான் வீட்டு நம்பருக்கு உமா ஃபோன்!.

விஷயத்தக் கேட்ட துரை, மத்த எல்லோரையும் கூட்டிக்கிட்டு வந்தான்!

விஷயம் இதுதான்!

இன்னும் ரெண்டு நாள்ள உமாவ பொண்ணு பார்க்க வர்றாங்க!

செலின் ஒருத்திதான் தீர்மானமாய்ச் சொன்னாள்!

விடுடா, எல்லாம் மறந்துபோகும்!

சைலண்ட்டா உட்கார்ந்திருந்த கார்த்தியப் பார்த்து துரை அலற, என்னன்னு பார்த்தா, பிளேடு எடுத்து கைல தாறுமாறா அறுத்து, ரத்தமா சொட்டுது!

இப்ப என்ன சொல்றேன்னா, இரக்கமே இல்லாம செலின் சொல்றா, “இவன் சாகமாட்டான்!

நீ ஒரு எமோஷனல் இடியட்!

இப்ப எதுவும் இதுக்கு சாதகமா முடிவெடுக்காதே!

அவ பேச்ச அப்படியே ஒதுக்கி, “கார்த்தி, நீ அவள உங்க ஊருக்கு கூட்டிக்கிட்டுப்போயிரு"!

ஐயோ, எங்க ஐயன் கட்டிவெச்சு தோல உறிச்சுருவாரு!

அப்ப மூடிக்கிட்டுப் போய் படிக்கற வேலையப்பாரு! - இது செலின்!

எப்படியாவது எங்கள சேர்த்தி வெச்சுருடா!

இல்லாட்டின்னா, நான் செத்துப்போயிருவேன்!

“Bullshit! கல்யாணம் ஆனாத்தான் மெச்சூரிட்டியே இல்லாத நீ செத்துப்போவடா முட்டாளே!” - இது செலின்

 இள ரத்தங்கள் செய்த முட்டாள்தனமான கல்யாண ஏற்பாட்டில், இரண்டு குடும்பமும் குலைந்தது

கல்யாணத்துக்குப்பின் வந்த திடீர் சுமையில் குறைகள், கலாச்சார முரண் எல்லாம் பெரிதாகத் தெரிய, ஓயாத சண்டையில்,மூன்றாவது மாதம், கார்த்தி விஷம் குடித்து செத்துப்போனான்.

உமா?

பெருந்தன்மையான அத்தை மகனை அடுத்தவருடம் கட்டிக்கொண்டு ஆஸ்திரேலியா போனாள்!

இந்தக் கல்யாண ஏற்பாடு எதிலும் பட்டுக்கொள்ளாத செலின்தான் உமாவுக்கு தைரியம் சொல்லி கூட இருந்தா!

எல்லாவிஷயத்திலும் அந்த வயதிலேயே அத்தனை தெளிவு!

வருடத்துக்கு நான்கைந்துமுறை வெள்ளைத் துணி உடுத்தி, வாயில் வெள்ளை துணி கட்டிக்கிட்டு ஜெயின் துறவிகள் பாதயாத்திரையா வருவாங்க! திண்டல்ல இருந்து அவங்களோட ஒரு பெரிய நார்த் இண்டியன் கூட்டம் நடந்து வரும்! அதில் பக்திப்பழமா செலின்!

என்னடி, இது உன் கேரக்டருக்கே ஒட்டலையே?

என்னடா செய்ய, இல்லாட்டி சோறு கிடைக்காதே!

உங்க தமிழ் சினிமா காதல் மாதிரி இவங்க செய்யறதெல்லாம் அத்தனை கிரிஞ்மெட்டீரியல்!

என்ன செய்ய, பக்தி முகமூடி போட்டுக்கிட்டா எல்லா அபத்தமும் கேள்விக்கு அப்பாற்பட்டதுதானே?

ஊரெல்லாம்  கொண்டாடிய மரோ சரித்ராவை பிராக்டிகல் க்ளாஸ் கட் அடிச்சுட்டு போய் பார்த்தபோது க்ளைமாக்ஸ்ல செலின் சத்தமா சிரிச்சுக்கிட்டு அடிச்ச கமெண்ட்டை இங்கே சொல்லமுடியாது!

ஒருநாள் திடீர்ன்னு கேட்டா, டேய், பொண்ணுங்களுக்கு ஒரு சிகரெட் வந்திருக்காமே, MSன்னு, கெடச்சா ஒரு பாக்கெட் வாங்கிட்டு வா!

எதுக்குடி?

சும்மா, ட்ரை பண்ணிப்பார்க்கலாமே, அப்படி என்னதான் இருக்குஅந்த கருமம் பிடிச்ச சிகரெட்ல?

கேட்டது செலினாச்சே?

அலைஞ்சு திரிஞ்சு, காலேஜ் ஹவுஸ் பக்கத்துக்கு பெட்டிக்கடைல வாங்கிட்டு வந்து கொடுத்தா, ஒன்னை எடுத்து பத்தவச்சு ரெண்டுஇழுப்பு!

அவ்வளவுதான்!

எப்படிடா குடிக்கறானுக இந்தக் கருமத்தையெல்லாம்!

அன்னைக்கு முழுக்க பபுள்கம், பாக்கு, பீடா எல்லாம் மென்னு, டேய், வாயில சிகரெட் நாத்தம் வருதா பாரு!

இந்த பாக்கெட்டை என்னடி பண்ண?

ம், தொரைசாமிக்கு கொடு, நான் கொடுத்தேன்னு. சாமி படத்துக்கு பின்னாடி வெச்சு பூஜை பண்ணுவான்!

செகண்ட்இயர் படிக்கும்போது துரை தைரியமா அவகிட்ட ப்ரொபோஸ் பண்ணினான்!

செலின், லவ் யூ!

சரி, பண்ணிக்கோ!

என்னடி இப்படி சொல்றே?

வேறென்ன சொல்ல?

எனக்கு மீசையில்லாம மழுங்க செரைச்சுக்கிட்டு எவனாவது ஒரு பீடா சேட் குதிரைல வருவான்! அவனைத்தான் நான் கட்டிக்கப்போறேன்! நீ பாட்டுக்கு இப்படி ஓரமா உட்கார்ந்து என்னை லவ் பண்ணிக்கோ, எனக்கென்ன?

இப்படி கொடிமாதிரி இருக்கற சேட்டுப்பொண்ணுக கல்யாணத்துக்கு அப்புறம் எப்படி ஆவாங்கன்னு பார்க்கணுமா, என் வீட்டுக்கு வா, எங்க அம்மாவைப்பாரு!

நெய்யும் ஸ்வீட்டுமா உக்கார்ந்துக்கிட்டே தின்னு பீப்பாய் மாதிரி ஆயிடுவேன்! பரவால்லியா? வெறும் செகப்புத் தோலுக்கு ஏன்டா இப்படி வழியறீங்க!

மேற்கொண்டு பேச அவனுக்கென்ன பைத்தியமா?

ஒருநாள் தனியா இருக்கும்போது கேட்டா,

டேய், எனக்கு சிக்கன் பிரியாணி வாங்கித் தர்றியா?

வாங்கித் தர்றதா, வா, மரப்பாலம் மெஸ்ல போய் சூடா சாப்பிட்டுட்டே வரலாம்!

முட்டாக்கம்மினாட்டி, எவனாவது பார்த்தா என்ன ஆகறது?

எங்க வீட்ல வெங்காயம் பூண்டே ஆகாது! எங்க அப்பனுக்குத் தெரிஞ்சா, உயிரோட எரிச்சுடுவாரு!

சரி விடு, எங்க அம்மாவை செஞ்சு தரச் சொல்லி டப்பால எடுத்துட்டு வர்றேன்!

வந்து எல்லார் முன்னாடியும் பப்பரப்பேன்னு நீட்டித் தொலைக்காத!

அடுத்தநாளே காலேஜ் பிள்ளையார் கோவிலுக்குப் பின்னாடி உட்கார்ந்து ஒரு டப்பா பிரியாணியையும், கண்ணில் தண்ணி வர நைஸ், நைஸ் ன்னு சொல்லிக்கிட்டே தின்னு முடிச்சுட்டா!

அதுக்கப்புறம், வாரம் ஒருநாள் டிபன் பாக்ஸ் கொண்டுவந்து கொடுப்பது வழக்கமாய்டுச்சு!

ஒருநாள் அப்படி பிரியாணி சாப்பிட்டுட்டிருக்கும்போதுதான் சொன்னா

எப்படியாவது காலேஜ் முடிக்கறதுக்குள்ள ஒயினோ, ஜின்னா வாங்கி குடிச்சுப்பார்த்துடணும்! உங்க சுஜாதா சொன்ன மாதிரி, எதையும் ஒருமுறை!

எதையும்ன்னா, எதையுமேவா?

சாப்பிடறதை நிறுத்தி ஒரு நிமிஷம் உத்துப்பார்த்தாள்!

திங்க் யூ ஆர் ஸ்ட்ரைட் பெர்சன்! நீ கேட்க வந்தது அதுதான்னா, என் பதில் இதுதான்!

என் வரைக்கும் பிரியாணின்னா, நீ டப்பால கொண்டுவர்றதுதான்! பிரியாணி இப்படித்தான் இருக்கும்!

நாலு பக்கம் சாப்பிட்டுப் பார்த்து, வேறு ஏதாவது நல்லா இருந்து தொலைச்சு, அந்த பிரியாணிக்கு மனசு ஏங்கக்கூடாது!

என் பிரியாணி வரும்போது நான் சாப்பிட்டுக்கறேன் -அதுதான் பெஸ்ட்ன்னு. புரியுதா?

அவள் பிரியாணி குதிரைல வரும்போது நான் சென்னைல டெலிஃபோன் டைரக்டரி வெச்சு டோட்டல் போட்டு பழகிட்டிருந்தேன்!

எலிமென்டரி ஸ்கூல், ஹை ஸ்கூல், காலேஜ் எல்லாம் ஒவ்வொரு ஊர்ல! அதனால,பால்ய நட்புன்னு ஒன்னு இல்லவே இல்லை!

செலினையும் நான் ரொம்பல்லாம் மிஸ் பண்ணாத அளவு சென்னை என்னை எங்கேஜ்டா வெச்சுக்கிச்சுன்னுதான் சொல்லணும்!

அதுக்கப்புறம் ரெண்டு மூணு வருஷம் இருக்கும்!

ஒருநாள் லீவ்ல கோவை எக்ஸ்பிரஸ்ல மூணு மணிநேரம் லேட்டா ஈரோடு வந்து, வெறுத்துப்போய், ஊருக்கு பஸ் பிடிக்கறதுக்கு முன்னால, காலேஜ் ஹவுஸ்ல ஒருகாஃபி குடிக்க உட்கார்ந்திருந்தபோது, எப்படிடா இருக்கே ன்னு முதுகுல ஒரு அறை!

வடிவம் மாறாம அதே செலின்!

காலம் அவள்வரைக்கும் உறைஞ்சு போயிருந்துச்சு போல!

கொஞ்சம்கூட மாறல!

என்னடி புதுசா தலைல சீலையை இழுத்து விட்டுக்கிட்டு?

ஆனா, இடுப்பு தெரியுதுதானே? அதை அப்புறம் சொல்றேன், அதுக்கு முன்னாடி,

சொல்லு, உன் கணக்குப்பிள்ளை படிப்பெல்லாம் எப்படி இருக்கு?

அது நாசமா போகட்டும், நீ எப்படி இருக்கே?

பார்க்கறியே, அப்படியேதான் இருக்கேன்! ஒன்னரை வயசுல ஒரு பையன்!

எப்படி இருக்கார் உன் பிரியாணி?

சீ நாயே, அங்கே பார், நாலு டேபிள் தள்ளி நம்மளையே குறுகுறுன்னு பார்த்துக்கிட்டிருக்கே அதுதான்!

ஹாண்ட்ஸம்மா இருக்காரு. ஹிருத்திக் ரோஷன் மாதிரி! வா அங்கே போலாம்!

இருடா, கொஞ்சம் தனியா பேசிட்டு அப்புறம் போலாம்!

சரி, சொல்லு, எப்படி இருக்கே? சந்தோசமா இருக்கியா?

சந்தோஷமா? வசதியா இருக்கேன்! அதுதான் சந்தோஷம்ன்னா, சந்தோஷமாத்தான் இருக்கேன்!

என்னடி இப்படி சொல்றே?

உன்கிட்ட உண்மையைத்தான்டா சொல்லமுடியும்? நீதானே என் க்ரைம் பார்ட்னர்?

என் பெண்டாட்டி பஸ்ஸில் போகக்கூடாதுன்னு கல்யாணத்துக்கு முன்னாடியே  கார் வாங்கிட்டான்.

எல்லா வேலைக்கும் ஆளு! ஆனா என்ன, எனக்கு வாய்ச்சது அக்மார்க் சைவ பிரியாணி!

கல்யாணம் ஆன மறுநாளே, நீ ஏன் தலைக்கு சேலையை இழுத்து விடறதில்லைன்னு கேள்வி!

இடுப்பு தெரியலாம், மயிரு தெரியக்கூடாது! அப்படி ஒரு கல்ச்சர் எங்களுது!

ஹைலி ரிலிஜியஸ்!

ஒரு கோட்டுக்குள்ள ஓடிட்டேருக்கோம் செக்கு மாடு மாதிரி!

நீ சொல்லு! மட்றாஸ்ல எவகூட சுத்திட்டிருக்கே?

சொல்றேன், ஒருநாள்!

எழுந்துபோய் கைகுலுக்கி பேசியபோது ஹிருத்திக் ரோஷன் கண்ல  பெருசா சிநேகம் தெரியல!

சரி, கிளம்பலாம், ஒருநாள் கண்டிப்பா வீட்டுக்கு வாடா!

திருநகர் காலனிதானே?

எங்க ஆளுக வேற எங்க இருப்பானுக?

காரை எடுக்க அவர் போனதும், கையைப்பிடிச்சுக்கிட்டு மெதுவான குரல்ல சொன்னா,

பேசாம காலேஜ்ல யாரையாவது லவ் பண்ணி ஓடிருக்கலாம்!

டிட் ரியலி மிஸ்ட் சம்திங்?

போடா,  உன்னைமாதிரி ஒரு சென்டிமென்டல் இடியட் எனக்கு செட் ஆகாது!

அதுக்கு தொரைசாமியை கட்டிக்கிட்டு எருமைச்சாணி அள்ள போயிருக்கலாம்!

உன் காண்டாக்ட் நம்பர் கொடு!

அதுக்குள்ளே கார் வர, ஏறி டாட்டா காமிச்சுட்டு போய்ட்டா!

அப்புறம் ஏறத்தாழ ஒரு பத்து வருஷம் தொடர்பே இல்லை!

திடீர்ன்னு ஒருநாள், ஃபோன்ல, “டேய், குள்ள மோகன் எங்க ஏரியா போஸ்ட்மாஸ்டர்! அவன்தான் உன் நம்பர் கொடுத்தான், எப்படி இருக்கே? கல்யாண இன்விடேஷன் கூட கொடுக்கல ராஸ்கல்!

பத்து வருஷம் முன்னாடி ஹிருத்திக் ரோஷன் ஹார்ட் அட்டாக்ல இறந்துபோனதும் லேட்டாதான் தெரியவந்துச்சு, இடையில் அப்பப்போ போன்ல பேசறதோட  சரி, நேரில் பார்க்க வாய்க்கவே இல்லை.

ஆறு மாசம் முன்னாடி செலின் இறந்து போனதும் கூட, பத்து நாள் கழிச்சு மோகன் போன் பண்ணி சொல்லித்தான் தெரிஞ்சது!

செலின் செத்துட்டாடா! அவ பையன் போஸ்ட்டாபீஸ் அக்கவுண்ட்க்ளோஸ் பண்ண வந்தவன் சொன்னான். வீடெல்லாம் வந்தவிலைக்கு வித்துட்டு அமெரிக்காவுக்கே போய்ட்டான்!

ஒருவழியா அந்த இழப்புக்கும் மனசு பழகி மறக்க ஆரம்பிச்சபோது மூணு நாளைக்கு முன்னே, ஞாயித்துக்கிழமை ஒரு போன், ஏதோ வெளிநாட்டு நெம்பர்ல இருந்து! சுத்தமான அமெரிக்கன் உச்சரிப்பில்,

"அங்கிள், செலின் பையன் பேசறேன், அமெரிக்கால இருந்து!"

உங்ககிட்ட கொஞ்சம் பேசலாமா?

சொல்லுங்க தம்பி, நல்லா இருக்கீங்களா?

இருக்கேன் அங்கிள்,

அங்கிள், அப்பா இருக்கும்போதே அம்மாதான் எனக்கு எல்லாமே!

அப்பா போனதுக்கப்புறம், அவங்கதான் என்னை இந்த அளவுக்கு கைபிடிச்சு கூட்டி வந்தவங்க! இன்னைக்கு நான் இங்கே சிட்டிசன்ஷிப் வாங்கிட்டு செட்டில் ஆக அம்மா மட்டும்தான் காரணம்! அவங்க ஏதோ ஒரு மனக்குறையோடே இருந்ததா எனக்கு பட்டுக்கிட்டே இருந்துச்சு! எத்தனை கேட்டும் என்கிட்ட

எதுவுமே சொல்லாம போய்ட்டாங்க!

அம்மாவோட கொஞ்சம் புக்ஸ் டைரி எல்லாம் அவங்க நியாபகார்த்தமா எடுத்துட்டு வந்தேன்!

சம்திங் ஸ்ட்ரோக் மீ!

அதில் ஒரு டைரி முழுக்க, BS, I might 've told you அப்படின்னு எல்லாப்பக்கமும் நெருக்கமா ஒரு லட்சம் தடவைக்குமேல் எழுதியிருந்துச்சு!

எனக்குத் தெரிஞ்சு, உங்களைப்பத்தித்தான் அம்மா நிறைய சொல்லியிருக்காங்க, உங்களுக்குத் தெரிஞ்சிருக்கும்ன்னுதான்!

யார் அந்த BS அங்கிள்? அம்மா மனசுல அப்படி என்ன உறுத்தல் இருந்திருக்கும்?

ஒரு நிமிஷம் யோசிச்சு பதில் சொன்னேன்!

அது வேற ஏதும் இல்லை! பால சரஸ்வதின்னு ஒருத்தி எங்க க்ளாஸ்ல இருந்தா, அவகூட உங்க அம்மா ஏதோகாரணத்துக்கு கோவிச்சுட்டு பேசறத நிறுத்திட்டா, அதுவாத்தான்இருக்கும்.

அவங்க இப்போ எங்கே இருக்காங்க அங்கிள், ஏதாவது காண்டாக்ட் நம்பர் கிடைக்குமா?

ஸாரிப்பா, அவங்க ஒரு கார் ஆக்சிடெண்ட்ல ரொம்ப வருஷம் முன்னாடியே இறந்துபோய்ட்டாங்க!

ஸாரி அங்கிள்,  உங்கள அனாவசியமா தொந்தரவு பண்ணிட்டேன்!

கீப் இன் டச்!

போனை வெச்சு வெகுநேரம் ஆகியும் அந்த போன்காலில் கேட்ட செய்தியை நம்பவே முடியல!

இந்த விஷயம் எனக்கே பெரிய அதிர்ச்சி!

இதை அவன்கிட்ட எப்படி சொல்ல?

காலேஜ் நாட்கள்ல Black Stallion, கறுப்புக் குதிரைன்னு  பேர் வச்சு, BS ன்னுதான் செலின் என்னைக் கூப்பிடுவான்னு இப்போ அவன்கிட்ட சொல்லி மட்டும் என்ன ஆகியிருக்கப்போகுது?