புதன், 21 செப்டம்பர், 2022

அறம் அனைவருக்குமானது!

அறம் பிறழ்ந்த சமுதாயத்தில் வாழ்கின்றோம் நாம்!

கூர்மையாக சீவப்பட்ட கலர் பென்சில் படத்தைப் பகிர்ந்து, “தமிழில் கூறு கெட்ட என்ற வார்த்தையே இல்லை, கூர் கெட்ட என்பதே மருவி…” என்றொரு வியாக்கியானம்! ஆர்வக்கோளாறால், அப்படி இல்லை, கூறு என்பது சங்க இலக்கியங்களில் எங்கெல்லாம் இருக்கிறது என மெனக்கெட்டு தரவுகளை எடுத்துப்போட்டு ஒரு விளக்கம் சொல்ல, அடுத்த கரணம், “இருக்கலாம், ஆனால் எளியோர் அந்த அர்த்தத்தில் சொல்வதில்லைமறுத்து ஏதோ சொல்ல, “நீர் எந்த கல்லூரியில் இலக்கணம் படித்தீர், ஒப்பிலக்கணம் அறிவீரோஎன்று அபத்தப் பிதற்றல்!

சரி, ஏதோ தவறான மனநிலையில் இருக்கின்றார்போல என்று அப்போதைக்கு மௌனமாக விலகிவிட்டேன்!

சில பல இணக்கமான உரையாடல்களுக்குப்பின், சில மாதங்களில் இன்னொரு பதிவு, “பிருத்விராஜன் என்றால் மண்ணாங்கட்டி அரசன் என்று பொருள்!”

மறுபடி, அது மண்ணாளும் அரசன் எனப் பொருள்படும் என்பதை தரவுகளோடு விளக்க,

நீர் சமஸ்கிருதம் அறிவீரோ, எந்த பல்கலைக்கழகத்தில் பயின்றீர்? நான் அனைத்து மொழியும் அறிவேன்…” என்று ஆரம்பித்து சகட்டுமேனிக்கு வசைபாடல்! உடனே ப்ளாக் வேறு

இப்படித்தான் அறிமுகம் அந்தத்தமிழ் அறிஞரை”.

அவர் எழுதியதாக சொல்லிக்கொள்ளும் அறியப்படாத புத்தகத்தின் அபத்தங்களை தர்க்க வாதத்தோடு பட்டியலிட்ட வேறொருவரை, அவர் பிறப்புவரை விமர்சித்து ஒரு பதில்!

அதில் ஒரு வார்த்தைகூட அந்த தர்க்கவாதத்துக்கு பதில் இல்லை!

எப்போதுமே தன்னை வியந்து போற்றிப் பாடும் சிறுமை!

அது அவரது இயல்பு

இங்கேயே ஒரு தம்பதியரை அப்பா, அம்மா என்று புகழ்ந்து, கருத்து மாறுபட்டதும், அவர்கள் சாதியை பிரதானமாக வைத்து, அவனே அவளே என்று, ஓரளவு நாகரீகமாகப் பேசக்கூடிய யாரும் பகிரத் தயங்கும் வார்த்தைகளால் வசைபாடிய வரலாறு ஊரறியும்!

மடிசார் கட்டும்போது அவாள்ளாம் ஜட்டி போடுவாளா?”

மீசை எடுத்ததும் எங்காத்துப் பிள்ளை போல இருக்கேடா அம்பி, இனி பாப்பாரக்குட்டியெல்லாம் உன்னை ஈஷிண்டு நிக்கப்போறதுன்னு மாமியெல்லாம் என்கிட்ட வழியறா!”

இது உள்ளதற்குள் ஓரளவு நாகரீகமான விமர்சனங்கள், இன்று தமிழுக்கு தன்னைத்தானே அத்தாரிட்டி என்று சொல்லிக்கொள்ளும் பேரறிஞர் கண்ணபிரானின் பதிவுகளில் இருந்து!

அவர் மற்றவர்களைச் சொல்வதுபோல் தமிழ் அறிவே அற்றவர் என்று வசைபாடவில்லை! அவரது பல பதிவுகள் உயர்தரம்- அதன் வேரைத் தேடிப் போகும்வரை! தான் தேடித்தேடிப் படித்தவற்றை, தன் கருத்தாகப் பதிவதும், பாராட்டுப் பெறுவதும் எல்லோரும் செய்வதே! (Poster of the day போல)

இங்கு பலரும் ஓரளவேனும் தமிழ் அறியக் காரணமானவர் அவர்!

ஆனால், தற்சமயம் விவாதம் அவரது தமிழ் வாசிப்பையோ, அதைப் பகிர்வது பற்றியோ அல்ல!

அவர் தன்னை முனைவர் என்று சொல்லிக்கொள்வதும் யாரையும் பாதிக்கப்போவதுமில்லை! அதை சரிபார்ப்பதும் தேவையற்றது!

ஆனால், UC Berkeley university யில் தான் முனைவர் பட்டம் பெற்றதாய் அவர் பகிர்ந்ததோடு, அதை அடிப்படைத் தகுதியாகவைத்து அரசியல் ஆதாயமும், பதவியும், அங்கீகாரமும் பெற முயலும்போது, அதன் உண்மைத்தன்மையை ஆராய அனைவருக்குமே உரிமை உண்டு!

நானே சொன்னாலும் அதைக் கேள்வி கேள் என்று சொன்ன பெரியார் அறக்கட்டளையின்கீழ் இயங்கும் பல்கலைக்கழகம், எந்த ஒரு கேள்வியும் கேட்காமல் அவருக்கு கௌரவ முனைவர் பட்டம் வழங்கி கௌரவித்திருக்கிறது!

இப்போது அவர் அதிகாரப்பூர்வமான முனைவர் ஆகிவிட்டார்! வெகு சிறப்பு! ஆனால் அது ஒரு மகத்தான பொய்யின் அடிப்படையில்!

அதோடு நில்லாமல், அவர் முதல்வரின் நம்பிக்கைக்கு முற்றிலும் பாத்திரமான ஒருவர் உதவியோடு முதல்வரை சந்திக்கிறார்! தன்னை வந்து சந்திக்கும் எல்லோருடைய பின்புலத்தையும் முதல்வர் ஆராயவேண்டிய அவசியம் இல்லை, அது நடைமுறை சாத்தியமும் இல்லை! தன்னை சார்ந்தவர்கள் அந்த வேலையை செய்தபிறகே தன்னிடம் அழைத்துவருவார்கள் என்ற நம்பிக்கையின் அடிப்படையிலேயே அவர்களை சந்திக்கவும், தன்னோடு புகைப்படம் எடுக்கவும் அனுமதிக்கிறார் முதல்வர்!

அப்படி சந்தித்து முதல்வருக்கு வழங்கிய புத்தகத்தின் அட்டை முதற்கொண்டு பித்தலாட்டம்!

இது முதல்வருக்கும் தன் கட்சிக்கும் எத்தனை பெரிய ஊறு என்பதைக்குறித்து அழைத்துப்போன பெரிய மனிதருக்கு அக்கறை இல்லை! நாளை இந்தப். புகைப்படமும் இந்த முனைவர் பட்டமும் அந்தப் போலியால் தவறாக உபயோகிக்கபட்டால் அவர் பொறுப்பேற்றுக்கொள்வாரா?

இதையே வேறொரு சிறிய உதாரணத்தோடு பார்ப்போம்!

யாரோ ஒருவர், சில மருத்துவக் கட்டுரைகளை ஆய்ந்து படித்து, அவற்றை இங்கு தொடர்ந்து பகிர்வதன்மூலம், தன்னை ஒரு மருத்துவராகவே நிறுவமுடியும்!

அவர் உலகப் புகழ் பெற்ற ஒரு மருத்துவப் பல்கலைக் கழகத்தில் முதுநிலை மருத்துவராக பட்டம் பெற்றதாகக் கூறினால் யாரும் அதை ஆராயப்போவதில்லை!

ஆனால், அவருக்கு அவர் சொன்ன தகவல்களின் அடிப்படையில் சென்னை மருத்துவக் கல்லூரி கௌரவ விரிவுரையாளர் பதவி வழங்குமேயானால், அவரது தகுதியின் உண்மைத்தன்மையை பரிசீலிப்பது அவசியமாகிறது

அதுதான் இப்போது இவர் விஷயத்திலும் நடக்கிறது!

அழைத்துவந்த கல்வித் தந்தையோ, தான் அவர் சான்றிதழைப் பார்ப்பதுகூட அவரை அவமதிப்பது போலாகும் என்று பார்க்காமலே அழித்துவிட்டதாகவும், ஏன், மற்ற சாதியினர் கல்வித்தகுதியை மட்டும் பரிசீலிக்கவேண்டும் என்று வழக்கம்போல் சாதிக் கேடயத்தை தூக்கிப் பிடிக்கிறார்!

உண்மையும் நேர்மையும் எல்லா சாதிக்குமே அடிப்படைத் தேவை!

ஒரு பல்கலைக்கழகத்தில் மாணவர்களின் தொடர் தற்கொலைகள் குறித்து சந்தேகம் எழுப்பியபோது அந்தப் பகுதி காவல் ஆய்வாளர் திரு. … லஞ்சம் வாங்கிவிட்டார் என்று சொல்கிறீர்களா என்று வேர்வரை போய் உண்மையை காப்பாற்றியவர் என்பது இதில் அபத்த முரண்! (இப்போது மாறிவரும் காட்சிகளால், அவரே இனி கேள்வி எழுப்புவார் என்பது வேறு விஷயம்)

சில்க் சுமிதா உள்ளாடை வண்ணம் முதல், ஒரு குறிப்பிட்ட சாதிப் பெண்களின் மார்பக வடிவம் வரை தரவுகளோடு பக்கம் பக்கமாக விவாதிக்கும் அந்த தமிழறிஞர் தன் நேர்மையை நிரூபிக்க முயலாமல் ஓடி ஒளிந்துவிட்டார்!

முட்டுக் கொடுப்பவர்கள் கேள்வி கேட்பவரின் சாதியை தோண்டியெடுத்து வர்ணம் பூசிக்கொண்டிருக்கிறார்கள்!

பாவம், அதே கட்சி அன்பர் ஒருவர், தன் பெயர் காரணமாக, தான் பார்ப்பன சதிகாரனோ கைக்கூலியோ இல்லை என்று நிரூபிக்க, தன் சாதியை சொல்லி புலம்பும் நிலைக்கு தள்ளப்பட்டிருக்கிறார்!

இதுவரை வந்த முட்டுகளிலேயே தரமானது, அவர் தன் சுயவிபரத்தை பொதுவெளியில் பகிரத் தயங்கி, பல்கலைக் கழகப் பெயரையும், தான் பட்டம் பெற்ற துறையையும் ஏன் மாற்றிச் சொல்லியிருக்கக்கூடாது என்பது!

அபாரம்!

இந்த அபார முட்டுக்கு விளக்கம் சொல்வது வீண் வேலை! அந்தப் போலி அடையாளத்தை பயன்படுத்தி ஆதாயம் அடைவதையும் அவர் முட்டுக்கொடுக்கக் கூடும்!

இதில் இன்னும் பேரவலம், அவருக்கு ஒரு குறிப்பிட்ட கட்சியினர் மட்டுமே பெரும்பான்மை முட்டுக் கொடுப்பது!

ஆதாயம் தேடி கட்சியில் இப்போதைக்கு இணைந்த அந்தப் புதுமுகங்களுக்கு கட்சியின் வரலாறு தெரிய நியாயம் இல்லை!

தன் ஞானத் தந்தையின் செயலையே கேள்வி கேட்டு வெளியே வந்து ஆரம்பித்த இயக்கம் அது!

பல வருடங்களுக்கு அதன் செயற்குழு கூட்டத்தில் அனல் பறக்கும்!

அன்றைய முரசொலி கிடைத்தால் படித்துப் பாருங்கள்!

கலைஞரையே, அவரைவிட பல படிநிலைகள் கீழிருப்பவர்கள் முகத்துக்கு நேராக விமர்சித்ததும், அதில் உண்மை இருப்பின், மறுநாள் கலைஞர் அவர்களை பாராட்டி அறிக்கை விடுவதும் வாடிக்கை நிகழ்வு!

அப்படிப்பட்ட கட்சியை தாங்கிப்பிடிக்க வந்ததாகக் கூறிக்கொள்பவர்கள் இன்று தாங்கள் கொடுக்கும் முரட்டு முட்டுக்கு வெட்கித் தலை குனிய வேண்டும்!

அப்படி நீங்கள் காப்பாற்றியே ஆகவேண்டிய அளவுக்கு அவர் ஒன்றும் உங்கள் கட்சிப் பற்றாளர் இல்லை

உங்களைவிட பெரிய ஆதாயம் தேடி இங்கே கரை ஒதுங்கியவர் அவர்!

சில வருடங்களுக்குமுன் அன்றைய அதிமுக அரசின் கல்வி அமைச்சரை ஒருமையில் விமர்சித்து பதிவிட்டு, அடுத்த வாரமே அந்த அமைச்சர் அமெரிக்கா சென்றபோது, அவர் காலடியில் மண்டிபோட்டு (literally) அமர்ந்து ஈயென இழித்து அதையும் பெருமையாக பதிவிட்டு மகிழ்ந்த நேர்மையாளர்தான் அவர்

அந்தக் கட்சிக்கு என்று ஒரு பெயர் இருக்கிறது, முதல்வர் நேர்மையாளர் என்பது மாற்றுக் கட்சியினரும் ஒப்புக்கொள்ளும் உண்மை!

அதை சில்லறைகளின் ஆதாயத்துக்கு பலி கொடுக்காதீர்கள்!

அறம் கட்சி சார்பற்றது!

அதிலிருந்து பிறழாதீர்கள்- யாருக்காகவும்!


செவ்வாய், 13 செப்டம்பர், 2022

ஓயாத விவாதங்களுக்கு ஒரு பதில்!

நீயா நானா விவாதங்களும் ஒப்பீடுகளும்!

முதலில் ஒரு டிஸ்கி!

இதுவரை அந்த நிகழ்ச்சி ஒரு எபிசோட் கூடப் பார்த்ததில்லை- எல்லாமே இங்கு பார்க்கும் பிட்டுக்கள்தான்!

அந்த நிகழ்ச்சி பற்றிய விவாதங்கள் இன்னுமே டிஎல்லில் ஓயாததால்….

பட்டிமன்றத்தில் மனைவியை/ கணவனை தாழ்த்திப்பேசுவதில்லையா என்பதிலிருந்து ஏகப்பட்ட ஒப்பீடுகள்!

அந்தப் பட்டிமன்ற விவகாரம் ஒரு ஒப்புக்கொள்ளப்பட்ட விகாரம்!

அங்கே உளறுவது எல்லாமே கைதட்டலுக்கான அபத்தம் என்பது எல்லோருக்குமே தெரிந்தது!

அடுத்து அந்த 200 கிமீ விவகாரம்! அதையும் எல்லோருமே கண்டித்திருக்கிறார்கள்! ஆனால் அந்தப் பெண்ணுக்கு விழுந்த அடியின் உக்கிரம் இதில் இல்லை !

காரணம் வெகு எளிது

நான் பார்த்த க்ளிப்பிங்கில் அந்த மனிதரின் பேச்சில் அத்தனை வன்மமும் நக்கலும் இல்லை!

அது அந்தப் பெண்ணிடத்தில் ஏராளமாக கொட்டிக்கிடந்தது! அதை பொது இடத்தில், முகத்துக்கு நேராக எக்ஸிபிட் செய்தது கொடூரம்!

மேலும், ஆண் சமைப்பதைக்கூட ஓரளவு நக்கலோடு ஏற்றுக்கொள்ளும் சமூகம், பாத்திரம் தேய்ப்பதையும், வீடு கூட்டுவதையும் எப்படி விமர்சிக்கும் என்பது எல்லோருக்குமே தெரிந்ததுதான்!

அந்தப் பொதுப்புத்தியிலிருந்து கொஞ்சம் கொஞ்சமாக பலர் வெளியே வருவது நல்ல விஷயம்!

இன்னொன்று அந்தப் பெண்ணை குறை சொல்லி நானெல்லாம் அப்படி இல்லை என்று நிரூபிக்கவே இத்தனை விமர்சனமும் என்பது!

இருக்கலாம்! நானெல்லாம் அப்படி இல்லை என்பதே நல்ல விஷயம்தானே

மேலும், ஒப்பீடுதானே நல்லது கெட்டது என்பதை தீர்மானிப்பது? ஒப்பீடற்ற எதுவுமே நல்லதுமல்ல, கெட்டதுமல்ல, வெறும் நிகழ்வு!

உதாரணங்களை என்போன்ற சிலர் வெளியிலிருந்து எடுப்பதில்லை!

மனைவி கொஞ்சம் பின் தூங்கி, பின் எழுபவர் என்பது எனக்கு வசதி! சமையலில் இருக்கும் மையல் என்பதைவிட, வீட்டிலிருக்கும் மூன்று நண்பர்களைத்தவிர வெளியே யாரோடும் ஒட்டாத ஒரு செமி இண்ட்ரோவர்ட்க்கு சமையல்தான் சரியான பொழுதுபோக்கும் கவலை கொல்லியும்!

அதிகாலை எழுந்து காஃபி கடமை முடிந்ததும், கல்லூரிக்கு ஏழு மணிக்குக் கிளம்பும் மகனுக்கு ப்ரேக்ஃபாஸ்ட்க்கு தினமும் ஏதாவது ஒன்றை செய்து ஊட்டிவிட்டு அனுப்புவது நானாக இழுத்துவிட்டுக்கொண்ட சந்தோஷம்!

வீராவுக்கு முட்டை வேகவைப்பதும், காய்கறி சாதம் குக்கரில் வைப்பதும் இன்னொரு ருட்டீன்!

பிள்ளைகள் ஏதாவது கேட்டால் லஞ்ச்சுக்கும் ஏதாவது செய்துவைத்துவிட்டே அலுவலகம் கிளம்புவது நடைமுறை!

இதில் இருவருக்குமே ஒருமாதிரி உடன்பாடு!

ஆனால், தினசரி ஒரு விஷயத்தில் வாக்குவாதம்!

நீங்க என்னவோ சமையுங்க, நான் வேண்டாம்ன்னு சொல்லல, ஆனால் தயவுசெய்து பாத்திரம் மட்டும் தேய்க்காதீங்க, அதை சிங்க்கில் போட்டுவெச்சுடுங்க, எனக்கு கஷ்டமா இருக்கு!”

அவருக்கு கையில் கொஞ்சம் பிரச்னை, கூடவே எனக்கும் சமைத்த பாத்திரம் கழுவாமல் வைத்திருப்பது பிடிக்காத விஷயம்

எனவே, தினசரி அவர் இதை சொல்வது நடைமுறை

ஒருவேளை அவர் அப்படி சொல்வதை நிறுத்தினால் நான் பாத்திரம் தேய்ப்பதை நிறுத்திவிடுவேனோ என்னவோ!

இது பெண்ணுக்கான வேலை என்று பிரித்தால், ஆணின் வேலை என்ன

குழந்தைகள் படிப்பும், உறவினர்களோடு நட்புறவும், விசேஷங்களுக்கு தவறாமல் கலந்துகொள்வதும்

இந்த இரண்டுமே நான் ஃபெயில் மார்க் வாங்குமிடம்! அதை அவர் மிகத்திறமையாக, எனக்கு தொந்தரவில்லாமல் பார்த்துக்கொள்வதற்கு இது ஒரு சின்னக் கைமாறு!

காதல் ஒருவனை/ஒருத்தியை கைப்பிடித்து, அவர் காரியம்யாவினும்கை கொடுத்து என்பது இப்போது ஓரளவு பரவலாக ஒப்புக்கொள்ளப்பட்ட விஷயமாக இருக்கும்போது, அந்த இன்னொரு ஆணின் வாதம் அபத்தம், அந்தப் பெண்ணின் நக்கலும் வன்மமும் குற்றம் - அவ்வளவே!

கடைசியாக:

விஜய் டிவி நிகழ்ச்சிகள் எல்லாமே ஸ்க்ரிப்டட் என்பது பரவலாக ஒப்புக்கொள்ளப்பட்ட ஒரு விஷயம்!

அந்த நிகழ்ச்சி ஸ்க்ரிப்டட் என்றால் அந்தக் கண் கலங்கிய கணவனும், நையாண்டி செய்த மனைவியும் அவார்டுக்கான நடிகர்கள்!🌹🌹

ஆனால், அதிலும் அந்தப்பெண்ணின் சிரிப்பு கொஞ்சம் அருவெறுக்கத்தக்க மிகை!

வெள்ளி, 9 செப்டம்பர், 2022

ஈங்கிவனை யான் பெறவே…

என்ன தவம் செய்துவிட்டேன்…

த்தா.. பார்த்துக்கலாம்..

இன்று காலை ஒரு ஸ்டாஃப் மீட்டிங்!

எடுத்தவுடனே நேரடியாக விஷயத்துக்கு!

Boys, you must be aware of the financial status of the firm.

There was no billing in the second quarter excepting the retrofitted machine.

First quarter and the previous couple of years were also not better.

Even much bigger MNCs were reluctant to go for capital Equipments for the past years and just now the market is limping back to the progressive path.

Our capital is almost eroded and luckily we don’t have any external borrowings and managing with our internal accruals.

This month, we couldn’t find any other source to fulfil the salary obligation on date except waiting for the scheduled payment on 15th. This month the salary may be paid in two instalments. We request your extended support at this unprecedented circumstances.

யோசிக்காமல் உடனடியாக வந்த பதில்!

Sorry sir, this meeting is not really called for.

We are not only ready for the postponement but to forgo the salary till the situation improves.

Ours is the only company which paid salary all through the lockdown months.

But more than that, here we are allowed to learn and implement our ideas with ease.

Would you mind if I continue in Tamil?

இல்லை, சொல்லுங்க!

தேங்க் யூ சார், தமிழ்ல சொல்லும்போது மனசுல நெனைக்கறத அப்படியே சொல்ல முடியுது!

நீங்க அதிகம் டெக்னிக்கல் டீமோட இண்டராக்ட் பண்றதில்லை! ஆனால், நம்ம மெஷின் எல்லாமே முழுக்க முழுக்க R&Dன்றதால, சமயத்தில் டிலே ஆகறதும், பல விஷயங்களை ரீடூ(redo) செய்யறதும், தவிர்க்கமுடியாதது. அந்த சமயத்தில் நீங்க சொல்ற ஒற்றை வார்த்தைதான் எங்களை ஃபர்தரா வெறியோட இன்வால்வ்டா வேலை செய்ய வைக்குது!

விடுங்க, பார்த்துக்கலாம்!

அந்த பார்த்துக்கலாம்தான் எங்களுக்கு டானிக்!

போஸ்ட் கொரோனால வர்ற ஆஃபர் எல்லாமே இப்போ நாங்க வாங்கற சம்பளத்தைவிட குறைந்தது இரண்டு மடங்கு!

ஆனால் எங்க யாருக்குமேநம்மகம்பெனியை விட்டு போற ஐடியா கொஞ்சம்கூட இல்லை!

நீங்க அடிக்கடி சொல்றமாதிரி நாலெட்ஜ் பேஸ்ட் இண்டஸ்ட்ரில ஒர்க் ஃபோர்ஸ்தான் அஸெட்!

ஆனா எங்களுக்கு இங்கே கத்துக்கறதுதான் அஸெட்!

இந்தமாதிரி எங்களை, எங்க ஐடியாவை சுதந்திரமா செய்யவிட்டு கத்துக்க வைக்கற காலேஜ் இது!

இப்படியெல்லாம் எங்களை கூப்பிட்டுவைத்து நீங்க பேசறதே எங்களை அவமானப்படுத்தறமாதிரி இருக்கு!

நாங்கபோய் டிவிஎஸ் டெமோ, சிவா இண்டஸ்ட்ரீஸ் ப்ரோட்டோ டைப் எல்லாம் ரெடி பண்றோம்! நீங்க நிம்மதியா மார்க்கெட்டிங் வேலையை பாருங்க!

We know the orders in the pipeline and could sense the turn around very close.

இப்போ எங்க டர்ன் சார்

விடுங்க, பார்த்துக்கலாம்!

நம்பமுடியாத ரிலீஃப்ல உட்கார்ந்திருந்தபோது,

மே கம்இன் சார்?

வாங்க பேச்சிமுத்து, என்ன, ஏதாவது சொல்ல விட்டுப்போச்சா?

ஆமாம் சார், ரங்கராஜன் மட்டும் ஏதோ ஸ்கூல் ஃபீஸ் கட்டணுமாம், தடுமாறிட்டிருக்கார், உங்ககிட்ட கேட்கவும் சங்கடப்படறார்!

ஸாரி பேச்சி, நாளைக்கு அரேஞ்ச் பண்ணிடறேன்!

அதுக்கு நான் வரல, இதைப் பிடிங்க!

அவர் நீட்டிய கவரில் ஐந்து லட்சம்!

என்ன இது பேச்சி?

எதுவும் சொல்லாம வாங்கி வைங்க சார்! இது நமக்குள் இருக்கட்டும்!

சேச்சே, நான் வேற ஏற்பாடு பண்ணிட்டேன். தேங்க்ஸ் பேச்சி!

சார், நீங்களும் சீனிவாசன் சாரும் எத்தனை வருஷமா சம்பளமே எடுத்துக்கலன்னு எங்களுக்குத் தெரியும்!

அதனால என்ன, அது எங்க கடமை இல்லையா?

இல்லை சார், எந்த முதலீடும் வாங்காம, எம்ப்ளாயீஸ்க்கு 5% ஷேர் ஒதுக்கி லாபத்தை எங்க அக்கவுண்ட்ல போட்டுட்டு வர்றீங்க, அதுக்கு ஒரு சின்ன கைமாறு!

அடுத்த ஆர்டர் வந்ததும் திருப்பிக்கொடுங்க! சந்தோஷமா வாங்கிக்கறேன்!

நாளைக்கு மத்தவங்களுக்கு சேலரி போட்றுங்க! எனக்கு இந்தமாசம் வேண்டாம்!

என்ன பதில் சொல்ல

மெதுவாக கேட்டேன்- ஏது இந்தப் பணம் பேச்சி?

இந்த ரெண்டு வருஷமா நீங்க கொண்டுவந்து போடற பணம் ஏதுன்னு நான் கேட்டேனா சார்? நீங்க எதையெதை வித்தீங்கன்னு எனக்குத் தெரியும்!

சொல்லிக்கொண்டே விடுட்டென்று வெளியே போனவர் மறுபடி உள்ளே வந்தார்!

சார், உங்க விஸில் சத்தம் கேட்டு ரொம்ப நாள் ஆச்சு!

நீங்க கேரளாவுக்கு ட்ரைவ் போயும்!

இந்த கவலை மூஞ்சி எங்களுக்கு பிடிக்கல! நாளைக்கு எங்காவது ஒரு லாங்க் ட்ரைவ் போய்ட்டு வாங்க!

அதுக்குள்ளே நாங்க ஏதாவது குளறுபடி செஞ்சு வைக்கிறோம், வந்த சொல்லுங்க, “விடுங்க பார்த்துக்கலாம்ன்னு!

பேச்சி, ஒரு நிமிஷம், நீங்க எல்லாம் இப்படி இருக்கும்போது எதுக்கு நாளைக்கு?

இப்போவே சொல்றேன்,

“விடுங்க..

த்தா.. பார்த்துக்கலாம்!”


நல்லவேளை, கசிந்த கண்கள் அவர் பார்வையில் படவில்லை!