ஞாயிறு, 27 பிப்ரவரி, 2022

நல்ல நட்புக்கான Ten Commandments 😊

எதிர் பாலினரிடை நட்பு!

இன்னுமே இது பேசுபொருளாக இருப்பதுதான் மிகப் பெரிய ஆச்சர்யம்!

ஒரு வாரமாக அடிக்கடி செக்ஸ்டிங், பாலியல் அத்துமீறல்கள் பற்றிய ஸ்பேஸ்களைப் பார்க்க நேர்ந்தது!

கூடவே, ஒரு pinned tweet கண்ணில் பட்டது!

“Sex பத்தி பேசாம ஆண்-பெண் பேசிக்கவே முடியாதா..? (Long term la)

அதற்கு வாய்ப்பே இல்லையா என்ன?”

என் முதல் பதில், “ஏன் முடியாது?”

இரண்டாவது, “ஏன், பேசினால் என்ன தப்பு?”

இரண்டுக்கும் காரணம் கீழே!

படிப்பிலும், தொழில் நுட்பத்திலும் சிகரம் தொட்டுவிட்ட இளைய தலைமுறைக்கு இந்த உறவுச் சிக்கல் மட்டும் ஏன் பலாப்பிசினாக ஒட்டிக்கொண்டு தொடர்கிறது?

விளம்பரத் துறையில் நான் பார்த்தவரை, ஏறத்தாழ அரை நூற்றாண்டாக மாறாத ஒரு விஷயம்,

இந்த சோப் போட்டுக் குளித்தால் ஆண்கள் உங்கள் மேல் வெறி கொண்டு பாய்வார்கள், இந்த ஷேவிங் க்ரீம் போட்டால்  பெண்கள் ஓடிவந்து கட்டிக்கொள்வார்கள், வெள்ளையாக இருந்தால் வேலை கிடைக்கும் என்று, எதிர்பாலினத்தை ஈர்ப்பதுதான் இந்தப் பிறவியில் செய்யப்போகும் மகத்தான சாதனை என்ற அற்புதமான போதனையை உங்கள் மண்டைக்குள் திணிப்பதுதான்!

என்ன, ஷேவிங் க்ரீமுக்கு நடந்தது இப்போது குறிப்பிட்ட ஜட்டி அணிந்தால் பெண்கள் மேலே பாய்வதும், ஒரு லுங்கி கட்டினால் பாத் டப்புக்குள் இழுத்துக் கட்டிக்கொள்வதும் என முன்னேறியிருக்கிறது!

இந்தக் கொடூர அபத்தத்தை கேள்வி கேட்டால், ஃபேர் அண்ட் லவ்லி க்ளோ அண்ட் லவ்லி ஆனதே பெரும் புரட்சியாகிப் புல்லரிக்கவைக்கிறது சமூகம்!

இந்த அபத்தக் கொடூரங்கள் போக, நம் சீரியல், சினிமா அபத்தங்கள் வேறு! எந்த டூயட் பாடலை ஒலியில்லாமல் பார்த்தாலும், இதையெல்லாம் எப்படி துணி போட்டுக்கொண்டு, என்று சந்தேகம் வருமளவு எக்ஸ் ரேட்டட்!

இப்படி ஒரு சமூகச் சூழலில் வளரும்வரைக்கும், எதிர்பாலின தொடர்பு என்பதே எட்டாக் கொம்புத்தேன்!

இந்த இழவையெல்லாம் நம்மால் மாற்றமுடியாது!

ஆனால், நம்மை நாம் மாற்றிக்கொள்ள முடியும்!

ஆண், பெண் நட்பென்பது இன்னுமே ஒரு சிக்கலான விஷயமாகவே ஏன் தொடர்கிறது?

எங்கோ ஒரு குக்கிராமத்தில் பிறந்து, மூக்கோட்டை மாதிரி ஒரு நகரத்தில் வளர்ந்த ரவிக்கு கால் நூற்றாண்டாக இயல்பாக, எளிமையான விஷயமாக இருப்பது ஏன் அவனுக்கு அடுத்த தலைமுறைக்கு இத்தனை சிக்கலாக?

போதனைதான் இருப்பதிலேயே ஈஸி என்பதால், என்னாலான ஒரு உபதேச ரத்தின மாலை!

நான் சொல்ல வருவது பொதுவாக நட்புக்கு என்றாலும், ஆண், பெண் நட்புக்கு, கொஞ்சம் அதிகமாக!

  1. தோற்றத்தை அடிப்படையாக வைத்து நட்பு!

உருவக் கேலியைவிட அபத்தம், உருவம் சார்ந்த ஈர்ப்பு! வெறும் அழகை வைத்துக்கொண்டு, நட்பில் என்ன செய்ய?

அது ஐஸ்வர்யா ராயாகட்டும் அல்லது துல்கர் சல்மான் ஆகட்டும்!

நீ ரொம்ப அழகா இருக்கே

சரி!

நீ ரொம்ப அழகா இருக்கே,

சரி!

அப்புறம்? வெறும் அழகு திகட்டிப் போகும்! அழகு, முதன்மை ஈர்ப்புக்கு ஓரளவு உதவலாம். நட்பு தொடர, அது ஒரு சின்னக் காரணிகூட ஆகமுடியாது!

அப்படி, அழகே பிரதானம் என்று தொடரும் நட்பு, எங்காவது படுக்கையிலோ, செருப்படியிலோதான் முடியும்.

    2.  நட்பில் அந்தரங்கம்!

இது மிக மிக முக்கியம்! உங்கள் நட்பு கடைச் சரக்கல்ல, ஷோ கேஸில் மாட்டி வைக்க! அது உள்ளாடையைப்போல அந்தரங்கமானது! அதன் வண்ணத்தை அனைவருக்கும் காட்டித் திரிய அவசியமில்லை, அது அசிங்கமும்கூட!

மாப்ள, நான் ஜாக்கி ஜட்டி போட்டிருக்கிறேன் என்று பெருமையடித்துக்கொள்வதல்ல எதிர்பாலின நட்பு. உங்களுக்கிடையேயான உரையாடல்களை, பொதுவான நண்பர்களிடம்கூட அனுமதியின்றிப் பகிர்வது பெரும்பிழை! உங்களுக்கு சாதாரணமாகத் தெரியும் ஒன்று அவருக்கு உங்களிடம் மட்டுமே பகிர்ந்துகொண்ட ரகசியமாக இருக்கக்கூடும்! பெண்கள் இந்த விஷயத்தில் மிக சென்ஸிட்டிவ் ஆனவர்கள்.

   3.   நட்பில் நேர்மை!

இது எல்லாவகை உறவிலும் அடிப்படை தகுதி! இங்கு இது இன்னும் கொஞ்சம் தீவிரமாக!

கவரிங் நகை எப்படிப் பொத்திவைத்தாலும், ஒருநாள் பல்லிளித்துவிடும்! அதைவிட வேகமாக பூச்சுக்கள் போர்த்த நட்பு! லட்சக்கணக்கில் கொடுத்து ப்ரைடல் மேக்கப் போட்டாலும், வாழப்போவதென்னவோ, சாயங்கள் களைந்த முகத்தோடுதான்! பேச நினைப்பதை நேரிடையாகப் பேசுங்கள்! உண்மையான நட்புக்குப் பூச்சுக்கள் தேவையில்லை! தக்கவைத்துக்கொள்ளும் ஆர்வத்தில் போலியாக, பாசாங்காக பழகுவது, நட்பை அடுத்த கட்டத்துக்கு நகரவிடாமல் தள்ளியே நிறுத்திவிடும்!

You look awkward in this outfit/ look gorgeous, இந்த விஷயத்தில் நீ செய்தது தவறு/ சரி. இதுபோல் எதுவும், மனதில் பட்டதை தயங்காமல் முகத்துக்கு நேராக சொல்லிப் பழகுங்கள்! முகத்துக்கு நேராக, முதுகுக்குப் பின்னால், இரண்டுமே ஒன்றாக இருப்பது நலம்!

If something disturbs you, அதையும் மட்டைக்கு இரண்டு கீற்றாய் பேசிப்பாருங்கள்! முதலில் முகம் இறுகக்கூடும்! ஆனால், நாளடைவில் நட்பு இறுகும்!

ஒருநாள் கொஞ்சம் தளர் உடை அணிந்து வந்திருந்த தோழியிடம், don’t stand leaning on my table, your hip is my major distraction என்று ரவி சொன்னதை நான் காதாறக் கேட்டிருக்கிறேன்! அந்தப் பெண் அசந்தர்ப்பமாக இறக்கும்வரை அவனுக்கு உற்ற தோழியாக இருந்ததும் எனக்குத் தெரியும்

   4.   அடுத்த கட்ட நகர்வு!

இங்குதான் பெரும்பாலும் தடுமாற்றங்கள் ஆரம்பிக்கும்! நட்பு, கண்டிப்பாக அடுத்த கட்டத்துக்கு நகர்ந்தே ஆகவேண்டியதில்லை! எல்லாத் தோழனும், தோழியும் வாழ்க்கைத் துணையாக முடியாது

உங்களுக்குத் தோன்றிய அதே அவருக்கும் தோன்றவேண்டியதில்லை! நட்புக்கிடையே தூதுகள் தேவையில்லை! கேட்குமுன் நன்கு யோசித்துக்கொள்ளுங்கள்! கேளுங்கள், வலியுறுத்தாதீர்கள்! மறுத்தாலும் நட்பைத் தொடருமளவு உங்கள் வார்த்தைகளில், நடத்தையில் கண்ணியம் இருக்கட்டும்! ஆனால் என்வரையில்

நட்பின் அடுத்த கட்டம் காதலல்ல! அப்படிக் கேட்கத் தோன்றும் நட்பைவிட, கேட்கவே தோன்றாத நட்பு ஆழமானது, அழகானது! அங்கே ஆரம்பம் முதலே புரிதல் சீராக இருக்கிறது என்று அர்த்தம்.

   5.   எல்லைகள் இல்லா நட்பு!

இங்கேதான் வருகிறது அந்த pinned tweetக்கான பதில்!

ரமேஷிடம் பேசமுடிந்த எந்த விஷயத்தையும் ராதிகாவிடமும் பேச முடிவதே நட்பு!

இது என் தோழன்/ தோழி என்ற நினைவைவிட, ஆண்/பெண் என்பது நினைவில் துருத்திக்கொண்டே நிற்கும் நட்பில் அந்த எல்லைகளுக்குள் மட்டுமே பேச முடியும், அப்படிப் பேசுவதே நலம்!

செக்ஸ் என்பது கண்டிப்பாக வளர் இளம் பருவத்தில் ஒரு குறுகுறுப்பு! அதைப்பற்றி தன் சம வயது நட்பிடம் பகிர்ந்துகொள்வதில் பிழையில்லை! பால்யம் கடந்தோருக்கு, அது ஒரு பழகிப்போன பழைய விஷயம்! அதில் பகிர்ந்துகொள்ளவோ பரவசப்படவோ ஏதுமில்லை! ஒரு குறிப்பிட்ட வயதைக் கடந்தபிறகும் அதை ஆர்வம் குன்றாது பேசுவது கண்டிப்பாக ஓரளவுக்கேனும் பர்வர்ஷன்தான்! அதிலும் வயது குறைவான எதிர்பாலினத்தோடு அப்படி யாராவது பேசும்பட்சத்தில் சொல்லாமல் விலகிவிடுவது உத்தமம்! அங்கு கள்ளம் கண்டிப்பாக இருக்கும்! அது நட்புக்கு உதவாது, உவக்காது! சம வயதினரிடை பேசுவதிலும், சில வரையறைகள் இருக்கின்றன

I had a great fucking sex yesterday என்பதைப் போன்ற சென்ஸிட்டிவ் விஷயங்களை சம வயது தோழனிடம், தோழியிடம் இயல்பாகப் பகிர்ந்துகொள்ள முடியும்! அதிலும் ஆரம்பம் முதலே எந்த பாகுபாடும் பார்க்காமல் தோழமையோடு மட்டுமே பேசுவோரிடம்! ஆனால் எல்லைகள் வகுத்துக்கொண்ட நட்புக்கு சிலபஸ் ஒன்று கட்டாயம் இருக்கிறது! அதை மீறும்போது, நட்பு தோற்றுப்போய், ஒதுக்கம் தவிர்க்கமுடியாது போகும்.

   6.   நட்பின் எல்லைகள்!

நட்பு என்று நேரிடையாக இல்லாமல், தற்காப்புக்காகவோ, சமூகம் குறித்த அச்சத்தாலோ, அண்ணன், தங்கை என்றோ அக்கா தம்பி என்றோ, உறவுமுறை வைத்தே பேசிப் பழகும் தோழமை ஒன்று உண்டு! இங்கு கட்டாயம் எல்லைகள் உண்டு! You should mean what you say என்பது அடிப்படை நாகரீகம்! உடன் பிறந்தாரோடு எதைப் பேசமுடியுமோ, அதை மட்டுமே இந்தவகை நட்போடு பேசமுடியும்! இவர்களிடம் கண்டிப்பாக செக்ஸ் பற்றி பேசுவது கீழ்த்தரம்! அக்கா, தம்பி, அண்ணன், தங்கை, அப்பா இதிலெல்லாம் மாதிரி என்ற suffix கிடையாது! பிறவியிலிருந்தே உறவானாலும், இடையில் வந்தாலும் உறவு ஒன்றுதான்! அப்படி உங்களால் எண்ணமுடியாவிடில் அந்த உறவுமுறை சொல்லி அழைப்பதை முதலில் நிறுத்துவது நேர்மை! இந்தவகை நட்பில் எல்லைகள் மிகத் தெளிவாக வரையறை செய்யப்பட்டவை.

   7.   ஈகோ என்னும் நட்புக் கொல்லி!

எல்லோரும், எல்லாத் தருணத்திலும் சரியாக இருக்க முடியாது! தவறுகளை ஒப்புக்கொள்ளப் பழகுங்கள்! நான்தான் சரி என்று அடம் பிடிக்காதீர்கள்! உங்கள் செயலோ, சொல்லோ, harmless என்று உங்களுக்குப் படலாம்! ஆனால் அதை எதிர்கொள்பவரை எங்கு தைத்தது என்பது உங்களுக்குத் தெரியாது! If someone says that they are hurt with that particular action, don’t ever try to justify that by proving your intentions. உங்கள் நோக்கம் முக்கியமே அல்ல! உங்கள் செயல் அவர்களை ஏதோ ஒருவகையில் பாதித்தது என அவர்கள் உணர்ந்தாலே, தயக்கமின்றி மன்னிப்புக் கேளுங்கள்! அதுவும் நட்பில் அவசியமான உரிமைதான்! அதுமட்டுமல்ல, தவறியும் அதை திரும்ப செய்யாதீர்கள், அதன்பிறகு எவ்வளவு பழகி, எவ்வளவு உரிமை எடுத்துக்கொண்டாலும்! அது நட்புக்கான சின்ன மரியாதை! A no is no forever.

   8.   எந்த நிலையிலும் விலகத் தயாராக இருங்கள்

சிலரோடு நட்பைத் தொடருவதில் சில சிக்கல்கள் இருக்கக்கூடும். Just because you wanted to be a friend, don’t hang on with anyone. இருவருக்கும் பரஸ்பரம் தோன்றாத எந்த உறவும் நிரந்தரமல்ல! ஒருவர் செய்வதும் சொல்வதும் இன்னொருவருக்குப் பிடிக்கவில்லை, அல்லது காயப்படுத்துகிறது, சில முயற்சிகளுக்கும் விளக்கங்களுக்கும் பிறகும் அது நீடிக்கிறது எனில், அந்த நட்பு உங்களுக்கானதில்லை! உடைந்த கண்ணாடியை சேமித்துவைத்துப் பலனில்லை! ஒரு காஃபி, கை குலுக்கலோடு, உறுத்தாமல் விலகிக்கொள்வது கிட்னிக்கு நல்லது! அதைவிடுத்து, ஒட்டாத உறவை தக்க வைக்க குட்டிக்கரணம் அடிப்பது அறிவீனம்! கட்டாயத்தாலோ, பரிதாபத்தாலோ தொடரும் நட்பு அர்த்தமற்றது! சகித்துக்கொண்டு வாழும் வலி நட்பிலாவது வேண்டாமே!.

   9.  முறிவிற்குப் பின்னான நடத்தை!

இங்குதான் பலரும் அசிங்கப்படுவதும், நிலை தவறுவதும்! நல்லவை அல்லவை எல்லோரிடத்தும் உண்டு! பழகும்வரை நல்லவர், விலகலுக்குப்பின் பூதக்கண்ணாடி வைத்துத் தேடி அவர் கெட்டவர்- இதுதான் பெரும்பாலும் பொதுவான நடைமுறை!

பிறிந்து போனவரை பிறரிடம் தூற்றாதீர்கள்! அது மற்றோரையும் உங்களிடமிருந்து மனதளவில் விலக்கி வைக்கும்! உங்கள் பிரிவுக்கான காரணத்தை போஸ்டர் அடித்து ஒட்டத் தேவையில்லை! அது உங்கள் இருவருக்குமான அந்தரங்கம்! அவர் உங்களைப்பற்றி தவறாகவே கூறித் திரிந்தாலும், உண்மையாய் உங்களைப் புரிந்தோரிடம் தன்னிலை விளக்கங்கள் தேவையில்லை! அது வதந்திகளுக்கும், வம்புக்கும் ரக்கை கட்டும் வேலை!

எனில், பிரிந்தவர் பற்றி பேசவே கூடாதா? இல்லை, பேச விஷயங்களும் இருக்கிறது! அவர் சொல்லோ செயலோ நடவடிக்கைகளோ அவரை தவறான பாதைக்கோ, சிரமத்துக்கோ இட்டுச் செல்லப்போகிறது என நீங்கள் உணர்ந்தால், குற்றம் சாட்டும் தொனியில் இல்லாமல், இருவருக்கும் பொதுவானவரிடம் மென்மையாக உண்மையைச் சொல்லி அவருக்கு உதவவோ அறிவுரை சொல்லவோ வேண்டுங்கள்! விலகிப்போனாலும் அவர் உங்கள் விரோதி அல்ல என்பதை உணருங்கள்! மறைமுகமாக அவருக்கு ஏதும் நன்மை செய்ய மறக்காதீர்கள்! ஒருநாள் பழகினாலும் உண்மை நட்புக்கும் அன்புக்கும் expiry date இல்லை!

   10.   ஊடலுக்குப் பிறகான கூடல்!

ஊடுதல் காமத்துக் கின்பம் அதற்கின்பம்

கூடி முயங்கப் பெறின்

இது வள்ளுவன் சொன்ன அழகான விஷயம்! இது காதலுக்கும் காமத்துக்கும் மட்டுமல்ல! நட்புக்கும் பொருந்தும்! ஒரு தவறான புரிதலுக்குப் பிறகு ஈகோவோ தயக்கமோ இல்லாமல் பரஸ்பரம் விளக்கங்கள் கூறி, அடித்துப் புரண்டோ, அழுது அணைத்தோ மீண்டும் சேரும் நட்பில், நான் பார்த்தவரை ஒட்டுதல் மிக அதிகம்! பிரிந்தவர் மீதான உங்கள் நேசமும், தேடலும் குன்றாதிருப்பின், நல்ல சந்தர்ப்பத்தில், உறுத்தாது உங்கள் தரப்பைச் சொல்லுங்கள்! பிரிவுக்கான காரணங்கள் உறவுக்கான தேடலின்முன் அற்பம் எனில், இருபுறமும் நட்பு நெருப்பு கனன்றுகொண்டிருந்தால் செம்புலப்பெயல் நீர்போல் அன்புடை நெஞ்சம் கலத்தலும் அதிகபட்ச சாத்தியமே!

இதுவரைக்கும் பொழுது போகாமல் சுற்றிச்சுற்றிச் சொன்னதின் ஒற்றை வரி synapses:

Be real, be honest and be you always.

அவ்வளவே 😊👍






செவ்வாய், 15 பிப்ரவரி, 2022

ஏன் பெண்களுக்கு மட்டும் மாதாந்திர அவஸ்தைகள்?

                 பீரியட்ஸ் வந்த கதை!

அதற்கு முன் கொஞ்சம் அகலிகையின் முன்கதை!

தேவர்களும் அசுரர்களும் பாற்கடலைக் கடைய, மோகினி அவதாரமெடுத்து எல்லா தகிடுதத்தமும் செய்து, விஷ்ணு தேவர்களை அமுதம் குடிக்கவைத்தபிறகு, அழகை காமத்துக்கு பயன்படுத்தியதற்கு பிராயச்சித்தமாக, தவத்துக்கு பயன்படும் விதமாக படைக்கப்பட்ட மாசு மருவற்ற பேரழகி அகலிகை என்கிறது ஒரு கதை! தவத்துக்கு எதுக்குடா பேரழகி உதவி அப்படின்னு பிரம்மனை யாருமே கேட்கல!

அவங்களுக்கு ஜொல்லுவிட ஒரு பேரழகி கிடைத்த சந்தோஷமே போதுமானதாக இருந்திருக்கு!

இன்னொரு வெர்ஷன், அமுத கலசத்தை ஏந்திவந்த அழகுக் கலசமே அகலிகைதான் அப்படின்னு!

எப்படி இருந்தாலும், அகல்யா என்றால் சற்றும் அப்பழுக்கற்ற, குறையில்லாப் பேரழகி என்று அர்த்தம்

பேர் வைக்கறதுல நம்ம ஆளுகதான் கில்லாடிகளாச்சே?

போதும், இனி கதைக்கு வருவோம்!

துடைத்துவைத்த தங்கக் குத்துவிளக்குபோல தகதகவென்று வந்து நின்ற அகலிகையைப் பார்த்ததும் தேவர் சபையிருந்த அத்தனை பேருக்கும் காமம் தலைக்கேறி அவளை அடைய நினைக்க, காதல் மன்னன் இந்திரனுக்கும், தவசிரேஷ்டர் கௌதம மாமுனிக்கும் அவள் மீது ஆசை பெருக்கெடுக்க

சாவுக்கும் சாபத்துக்கும் பயந்து, மற்ற அத்தனைபேரும் பொத்தினாற்போல் ஒதுங்கிக் கொண்டார்கள்!

இருவரில் இன்னாருக்கென்று தீர்ப்புச் சொல்லி சிக்கிக்கொள்ள பிரம்மன் மட்டும் கிறுக்கனா என்ன?

முன்னும் பின்னும் தலையுள்ள பசுவை யார் வலம் வருகிறீர்களோ, அவர்களுக்குத்தான் இந்தக் கன்னிகை சொந்தம் என்றொரு இம்பாஸிபில் ஜட்ஜ்மெண்ட்ட சொல்லிட்டு, கேப்ல கிடா வெட்ட முடியுமான்னு பார்த்துட்டிருந்திருக்கு தல!

யோவ், லூசா நீ ன்னு யாரோ பப்ளிக் இண்டரெஸ்ட் லிட்டிகேஷன் பெட்டிஷனோட எகிற, லைட்டா ஜகா வாங்கி, சரி, உலகத்தை யார் முதல்ல சுத்தி வர்றீங்களோ அவங்களுக்குத்தான் இந்த ஞானப்பழம், சீ! கன்னிப்பழம்ன்னு ஒரு அமெண்ட்மெண்ட் க்ளாஸ்!

த்தா, இதோ வர்றேன்னு இந்திரன் புறப்பட, கௌதமரை ப்ளாக்ல டிக்கெட் நான் வாங்கித் தர்றேன்னு நாரதர் ஓரங்கட்டிட்டாரு!

கோசாலைக்கு விறுவிறுன்னு இழுத்துட்டுப் போய், அப்போதான் கன்றை பிரசவிக்கற ஒரு பசுவைக் காட்டினார்! கன்றோட தலை அப்போதான் பசுவோட பின்பக்கம் வெளிய வருது

பசுவை வெச்சு பாலிடிக்ஸ் அப்போவே ஆரம்பிச்சுடுச்சு!

ஆஹா, கண்டேன் முன்னும் பின்னும் தலையுள்ள பசுவைன்னு கௌதமர் குதிக்க, எதுக்கும் இருக்கட்டும்ன்னு அந்தப் பசுவை ஒரு சுற்று சுற்றவிட்டு, இந்திரன் சபைக்கு கூட்டிட்டு வந்து, இருபுறமும் தலையுள்ள பசுவை கௌதமன் கண்ட கதையை நாரதர் சொல்ல, எல்லோருக்குமே கொஞ்சம் ஜெர்க் ஆச்சு

ஆனா, மாடிஃபைட் ஜட்ஜ்மெண்ட் வேறயாச்சேன்னு  யாரோ வெட்டிப் பஞ்சாயத்து கிளப்ப, தேபிகோ 420/126 செக்‌ஷன்படி, கன்றீனும் பசுவை வலம் வந்தால் உலகை சுற்றி வந்ததற்கு சமம் என்று நாரதர் அள்ளிவிட, வேறென்ன, அகலிகையை அடைந்தார் கௌதமர்!

உலகைச் சுற்றிவிட்டு மூச்சு வாங்க வந்த இந்திரன் வடை போச்சேன்னு நிற்க, கௌதமர் கிரஹஸ்தர் ஆனார்!

அதற்கப்புறம் இந்திரன் செய்த தகிடுதத்தம், சாபம் வாங்கி, அகலிகை கல்லானது, ராமன் கால் பட்டு மறுபடி பெண்ணானது - இதெல்லாம் ஜிவிஎம் படம் மாதிரி வாய்ஸ் ஓவர்ல தாண்டி

இப்போ க்ளைமேக்ஸ்!

இதுவரை நடந்த கதையில் ஏதும் கேள்விகள் இல்லைதானே?

எப்படி இருக்கும்

கதை கேட்டே வளர்ந்தவங்களாச்சே நாம்! நமக்கெங்கே கேள்விகள் வரப்போகிறது?

சரி, கதைதான் முடிஞ்சுபோச்சே, அப்புறம் என்ன, அதானே?

இருக்கு

அகலிகை அதுக்கப்புறம் பண்ணிய சம்பவம்

இனி, தவிர்க்க முடியாமல், கொஞ்சம் தூய தமிழ்!

இதோ, தேவர்கள் சபை முழுமையாக கூடியிருக்க, வழக்கோடு வந்தவள் அகலிகை!

அபார அழகி தொடுத்த வழக்கை வேடிக்கை பார்க்க மும்மூர்த்திகளோடு அவர்களின் மனைவியரும்!

சொல் அகலிகை, என்ன உன் வழக்கு?

நல்லவேளை, இந்த ஆண்கள் சபையில் முப்பெரும் தேவியரும் வந்திருப்பது என் அதிர்ஷ்டம்!

முப்பத்து முக்கோடி தேவர்களே, உங்கள் பார்வையில் பெண் என்பவள் யார்?

கேள்வியே புரியாமல் விதிர்த்தது தேவசபை!

அவள் ஒரு பண்டம்! நீங்கள் அடைய விரும்பும் ஒரு பொருள்! அதற்காக உங்கள் பராக்கிரமங்களைக் காட்டி, அவளைக் கவர்ந்து செல்வீர்கள்! அவள் தன் பத்தினித்தன்மையை உங்களுக்கு சேவகம் செய்து நிரூபித்து சொர்க்கம் புகவேண்டும். அதுதானே?

பெண்களை தாயென மதித்துப் போற்றும் சமூகம் நமது அகலிகை! உனக்குக் கொஞ்சம் அவையடக்கம் தேவை!

எனக்கு உடலின் பாதியை வழங்கியவர் சிவன்! லட்சுமியை தன் மார்பில் உறைய வைத்தவர் திருமால்! இப்படி பெண்கள் கொண்டாடப்படுவது உனக்குத் தெரியாதா? - இது பார்வதி!

நல்லது தேவி! தாங்கள் வேறு மாதிரி திருவாய் மலர்ந்திருந்தால்தான் ஆச்சர்யம்!

ஆணும் பெண்ணும் சமம் எனில், அவர்கள் என்ன வழங்குவது, நீங்கள் என்ன ஏற்பது? அது உடன்பாடா, யாசகமா தாயே?

முதல் கலகக் குரல் கேட்டு ஸ்தம்பித்தது சபை!

ஐந்தறிவு மிருகங்களே இணை தேடி, பிடித்தபின்பே சம்மதித்துப் புணரும்!

இங்கே ஒரு கடைச்சரக்காக பெண்ணை நிறுத்தி, போட்டியில் வெல்பவனுக்கு அவளை பரிசாகக் கொடுக்கிறீர்கள்! எனில், பெண்கள் உங்களுக்கு யார்?

ஒரு காலத்தில் பெண்களின் விருப்பத்தேர்வாய் இருந்தது சுயம்வரம்

அவள் மாலையிடுபவனே அவளுக்கு மணாளன்!

இது எப்போது மாறியது? யாரால் மாற்றப்பட்டது?

இப்போது உனக்கென்ன குறை அகலிகை?

ரிஷி பத்தினி என்ற கௌரவத்தோடு வலம் வரும் பாக்கியம் யாருக்குக் கிடைக்கும்?

சாபவிமோசனம் பெற்று அக்னிநட்சத்திரமாய் ஜொலிக்கும் உன் வாயிலிருந்தா இந்த வார்த்தைகள்?

அருமை ஶ்ரீதேவித் தாயே!

எனக்கான இணை இந்த கௌதமனா, இந்திரனா, அன்றி அதோ, அந்த வாயிற்காப்போனா, அதை தேர்ந்தெடுக்கவேண்டியது நான் தாயே!

என் துணையை தேர்ந்தெடுக்கும், என் வாழ்வை நிர்ணயிக்கும் உரிமை எனக்கன்றி வேறு யாருக்கு?

படைத்தவனுக்கே உள்ளது அந்த உரிமை!

அறிவழிந்து போனீர்களா சரஸ்வதி தேவி? சிந்திக்கும் திறனற்றுப் போனதா கல்விக் கடவுள்?

விலங்குக்கும் உள்ள உரிமைகள்கூட அற்றுப்போனவளா பெண்?

இடையில் ஒருத்தி, தலையில் ஒருத்தி, இடப்புறம் ஒருத்தி, வலப்புறம் ஒருத்தி, இதுதானா சமநீதி?

ஏன், அதுபோல உரிமை பெண்களுக்கும் வேண்டும் என்று கேட்க வந்தாயா அகலிகை?

அந்த அசிங்கத்தையும்தான் அடுத்த யுகத்தில் அரங்கேற்றினீர்களே! ஒரு பெண்ணின் விருப்பம் கேளாமல், ஐவருக்கிடையே கூறு போட்டீர்களே, அப்போதும் பெண் விருப்பம் எதுவென கேட்கப்படவில்லைதானே?

இப்போது உன் பிராது என்ன பெண்ணே, அதை மட்டும் சொல்! அவைக்கு வேறு வேலை இருக்கிறது!

எது? ரம்பையை ஆடவிட்டு ரசிப்பதா?

வரம்பு மீறிப் பேசுகிறாய் நீ!

வரம்பென்பதை யார் வகுப்பது?

கௌதமனைப் புணர்ந்தபோதெல்லாம் கல்லாய் உறைந்தவளை கல்லாக மாற சபிக்கப்பட்டதே பேரவலம்தானே?

வந்தவன் தேவேந்திரன் என்று உணர்ந்தே ரசித்துக் கலந்தேன்! அது ஆணாதிக்கத்தின் மீதான என் நேரடித் தாக்குதல் என்றால் எனைக் கற்புநெறி பிறழ்ந்தவள் எனுமோ இச்சபை?

அதிலென்ன சந்தேகம்?

என் விருப்பம் கேளாமல் என்னை ஆண்டவன் என் பதி!

என்னை திருட்டுத்தனமாகவேனும் புணர்ந்து தன் கேடு கெட்ட ஆண்மை அரிப்பை தீர்த்துக்கொண்டவன் தேவேந்திரன்!

அதற்கு எனக்கொரு சாபம்!

ஊர்மிளை விருப்பம் அறியாது லக்குவனை காடழைத்துச் சென்றவன், ரூமாவின் விருப்பம் ஏதெனக் கேளாமல் வாலியைக் கொன்று சுக்ரீவனுக்கு அவளைத் தந்தவன், எவனோ சொன்னான் என்று, தன் மானம் யாவும் தன் மனைவி கற்பில் இருப்பதாய் எண்ணி, அதை நிரூபிக்க அவளை தீக்குளிக்கச் சொன்னவன், ஆயிரம் மனைவியரில் ஒருத்திக்குப் பிறந்து, தன்னை விரும்புவதாய் நேரிடையாகச் சொன்னவளை மானபங்கப் படுத்தியவன்

அவன் கால்பட்டா எனக்கு சாபவிமோசனம்?

அன்றைக்குத்தான் மனமாற நான் மீண்டும் மனதளவில் முழுமையாகக் கல்லானேன்!

அகலிகை, தேவர் சபையை அவமதிப்பது எவ்வளவு பெரிய குற்றம் தெரியுமா? அதற்கு என்ன தண்டனை என்பதை நீ அறிவாயா?

இன்னும் ஆயிரம் ஆண்டுகள் போனாலும், பெண் எதை அணிவது, எதை அறிவது, எதை உண்பது எல்லாவற்றையும் ஆண்களே தீர்மானிக்கும் உலகில் வாழ சபிக்கப்பட்டதைவிட வேறேது கடும் தண்டனையும் சாபமும், பிரம்மதேவா?

வரம்பு மீறுகிறாய் அகலிகை, உடனடியாக மன்னிப்புக் கேட்காவிடில், மீண்டும் நீ சபிக்கப்படுவாய்!

சாபம்! நீர் யார் என்னை சபிக்க?

இதோ, என் சாபம் உங்கள் அத்தனை பேருக்கும்!

த்ரேதா யுகம் தொடங்கி, கலியுகம் வரைக்கும், பெண்ணாலேயே, பெண்ணுக்காகவே போரிட்டு மடியட்டும் ஆணினம்!

மதமும், மதம் சார்ந்த விஷயங்களுமே மனிதகுலத்தின் பேரழிவுக்குக் காரணமாகட்டும்!

உடல் அழகு மட்டுமே நம் சொத்து, அதனால் நாம் எத்தனை உரிமைகளை இழந்தாலும், சிறுமைப்பட்டாலும் பரவாயில்லை என்று வாழும் ஈசன் மனையாள் முதல் அனைத்துப் பெண்களுக்கும், மாதத்தில் சில நாட்களாவது தன் உடல் குறித்து முகம் சுளித்து அருவெறுத்து வெறுக்கும் நிலை வரட்டும், இது என்ன, இது எனக்கு வேண்டாமே என்று ஒவ்வொரு பெண்ணும் தன் உடல் கண்டு குறுகிப்போகட்டும்!

அந்த சில நாட்களில் ஆண்களும் உங்களைக் கண்டு அசிங்கப்பட்டு ஒதுங்கட்டும்!

நான் நேர்மையானவளானால், என் உணர்வுகள் உண்மையானால், இயற்கையே, பஞ்ச பூதங்களே, என் சாபம் பலிக்கட்டும்!

ஈசன் மனைவி முதல் எல்லா தேவ, மனித குலப் பெண்களுக்கும், ஆணோடு உறவுக்குத் தயாரான காலம் முதல், இனவிருத்திக்கு தகுதியுள்ள காலம் முடியும் வரை,

ரத்த அணுக்கள் போல, உடலுக்குள்ளேயே இன்றுவரை சுத்திகரித்துக்கொள்ளும் உபயோகப்படுத்தப்படாத கருமுட்டைகள்,

ரத்தமும் நிணமுமாய் சிதைந்து மாதம்தோறும் ஜனனப் பாதையிலேயே வெளியேறட்டும்!

அந்த வலியும் வேதனையும் அழுக்குப்பட்ட உணர்வும் இந்த அடிமைச் சிறுமதிக்கு தண்டனையாய் அமையட்டும்!”

எங்கோ ஒரு இடி இடித்தது

கண் கூசும் வண்ணம் ஒரு மின்னல் வெட்டியது!

ஐயோ, இது எனக்கு வேண்டாமே என்று முகம் சுளித்துப் பதற, தேவ சபை திகைத்து நிற்க, ஈசன் மனைவி காலிடை வெளிப்போந்தது ராஜஜ்வல்லையின் முதல் ரத்தம்!

புன்னகை மறையாது காற்றோடு கலந்தாள் அகலிகை!